shauq se KHud jo mere rah-numa hote hain

shauq se ḳhud jo mire rāh-numā hote haiñ

mirī qismat ki vahī ābla-pā hote haiñ

lafz kī bazm-e-pur-asrār meñ ḳhubān-e-ḳhayāl

kabhī mastūr kabhī chehra-kushā hote haiñ

sher ke ruup meñ Dhalte nahīñ vo hangāme

jo mirī bazm-e-tasavvur meñ bapā hote haiñ

ab ye aalam hai ki marne pe chale aa.eñ jo dost

vo bhī min-jumla-e-arbāb-e-vafā hote haiñ

yahī but shab ke añdhere meñ jo haiñ tālib-e-shauq

yahī but din ke ujāle meñ ḳhudā hote haiñ

koī parvānoñ ko samjhāo ki jiine ke sivā

aur bhī chand maqāmāt-e-vafā hote haiñ

bāda-noshī pe musir bāda-faroshī pe ḳhafā

mahv-e-hairat huuñ ki ye log bhī kyā hote haiñ

shar.a-o-ā.īñ kī har ik aaḌ meñ karte haiñ savāl

ye jo zartār qabāoñ meñ gadā hote haiñ

kyā batā.eñ tujhe kyoñ hote haiñ us bin bechain

nāsehā tang na kar kah jo diyā hote haiñ

mujhe biitī huī rātoñ kī mahak aatī hai

hijr ke din bhī tirī zulf-e-rasā hote haiñ

lab pe hotī huī āñkhoñ meñ hañsī jaatī hai

ai buto pyaar ke andāz judā hote haiñ

mire gulshan meñ jo pāband-e-qafas haiñ vo tuyūr

dīda-var sho.ala-zabāñ naġhma-sarā hote haiñ

nazar aate haiñ jahāñ ḳhuun ke dariyā jaarī

tah meñ dīvānoñ ke naqsh-e-kaf-e-pā hote haiñ

sher sun kar mire hañste haiñ ki āshiq hai kahīñ

ya.anī ḳhūbān-e-sitam-pesha balā hote haiñ

qarz jitne ġham-e-daurāñ ke haiñ mujh par 'ābid'

ġham-e-jānāñ ke vasīle se adā hote haiñ

shauq se KHud jo mere rah-numa hote hain

meri qismat ki wahi aabla-pa hote hain

lafz ki bazm-e-pur-asrar mein KHuban-e-KHayal

kabhi mastur kabhi chehra-kusha hote hain

sher ke rup mein Dhalte nahin wo hangame

jo meri bazm-e-tasawwur mein bapa hote hain

ab ye aalam hai ki marne pe chale aaen jo dost

wo bhi min-jumla-e-arbab-e-wafa hote hain

yahi but shab ke andhere mein jo hain talib-e-shauq

yahi but din ke ujale mein KHuda hote hain

koi parwanon ko samjhao ki jine ke siwa

aur bhi chand maqamat-e-wafa hote hain

baada-noshi pe musir baada-faroshi pe KHafa

mahw-e-hairat hun ki ye log bhi kya hote hain

shara-o-ain ki har ek aaD mein karte hain sawal

ye jo zartar qabaon mein gada hote hain

kya bataen tujhe kyon hote hain us bin bechain

naseha tang na kar kah jo diya hote hain

mujhe biti hui raaton ki mahak aati hai

hijr ke din bhi teri zulf-e-rasa hote hain

lab pe hoti hui aankhon mein hansi jati hai

ai buto pyar ke andaz juda hote hain

mere gulshan mein jo paband-e-qafas hain wo tuyur

dida-war shoala-zaban naghma-sara hote hain

nazar aate hain jahan KHun ke dariya jari

tah mein diwanon ke naqsh-e-kaf-e-pa hote hain

sher sun kar mere hanste hain ki aashiq hai kahin

yani KHuban-e-sitam-pesha bala hote hain

qarz jitne gham-e-dauran ke hain mujh par 'abid'

gham-e-jaanan ke wasile se ada hote hain