shauqin mizajon ke rangin tabiat ke

shauqīn mizājoñ ke rañgīn tabī.at ke

vo log bulā laao namkīn tabī.at ke

dukh-dard ke peḌoñ par ab ke jo bahār aa.ī

phal phuul bhī aa.e haiñ ġhamgīn tabī.at ke

ḳhairāt mohabbat kī phir bhī na milī ham ko

ham laakh nazar aa.e miskīn tabī.at ke

ab ke jo nasheboñ meñ parvāz hamārī hai

ham kaun se aise the shāhīn tabī.at ke

dekhī hai bahut ham ne ye film ta.alluq kī

kuchh bol takalluf ke kuchh scene tabī.at ke

is umr meñ milte haiñ kab yaar nashe jaise

daarū kī tarah tīkhe kokīn tabī.at ke

ik umr to ham ne bhī bharpūr guzārī hai

do-chār muḳhālif the do-tīn tabī.at ke

tum bhī to miyāñ 'fāzil' apnī hī tarah ke ho

dīñ-dār zamāne ke be-dīn tabī.at ke

shauqin mizajon ke rangin tabiat ke

wo log bula lao namkin tabiat ke

dukh-dard ke peDon par ab ke jo bahaar aai

phal phul bhi aae hain ghamgin tabiat ke

KHairaat mohabbat ki phir bhi na mili hum ko

hum lakh nazar aae miskin tabiat ke

ab ke jo nashebon mein parwaz hamari hai

hum kaun se aise the shahin tabiat ke

dekhi hai bahut hum ne ye film talluq ki

kuchh bol takalluf ke kuchh scene tabiat ke

is umr mein milte hain kab yar nashe jaise

daru ki tarah tikhe kokin tabiat ke

ek umr to hum ne bhi bharpur guzari hai

do-chaar muKHalif the do-tin tabiat ke

tum bhi to miyan 'fazil' apni hi tarah ke ho

din-dar zamane ke be-din tabiat ke