shiddat-e-dard aah se puchho

shiddat-e-dard aah se pūchho

hālat-e-dil nigāh se pūchho

jānñā ho jo rāz-e-lutf-e-hayāt

gardish-e-mehr-o-māh se pūchho

shīsha-e-dil ke TūTne kā haal

shorish-e-āh-āh se pūchho

raah meñ kitne kārvāñ gum haiñ

baat ye gard-e-rāh se pūchho

zarra-e-ḳhāk kī sar-afrāzī

manzil-e-mahr-o-māh se pūchho

dil kī ḳhuddāriyoñ pe kyā guzrī

tālib-e-rasm-o-rāh se pūchho

ai 'jamālī' talāsh kī lazzat

kisī gum-karda-rāh se pūchho

shiddat-e-dard aah se puchho

haalat-e-dil nigah se puchho

jaanna ho jo raaz-e-lutf-e-hayat

gardish-e-mehr-o-mah se puchho

shisha-e-dil ke TuTne ka haal

shorish-e-ah-ah se puchho

rah mein kitne karwan gum hain

baat ye gard-e-rah se puchho

zarra-e-KHak ki sar-afraazi

manzil-e-mahr-o-mah se puchho

dil ki KHuddariyon pe kya guzri

talib-e-rasm-o-rah se puchho

ai 'jamali' talash ki lazzat

kisi gum-karda-rah se puchho