shisha-e-saat mein paiham karwaTen leta raha

shīsha-e-sā.at meñ paiham karvaTeñ letā rahā

maiñ badalte vaqt kī gardish kā paimāna rahā

sham.a ne jal kar pareshāñ kar diyā mirā vajūd

tīrgī tak mujh se vābasta mirā saayā rahā

dūsroñ ko jo shikāyat mujh se thī bejā na thī

maiñ vo huuñ jis ko ḳhud apne aap se shikvā rahā

zindagī meñ jaane kitnī baar aa kar Tal ga.ī

vo ajal meñ raah jis kī umr bhar taktā rahā

zauq-e-rā.ij ke mutābiq nit na.e pahne libās

zer jaama jaisā bosīda thā bosīda rahā

ek lamhe ko milā thā kaif az-ḳhud raftagī

ik sadī se bhī ziyāda is kā ḳhamyāza rahā

ġhair ne jab tak na ā.īna dikhāyā a 'sharosh'

merā chehra ḳhud mirī nazroñ se poshīda rahā

shisha-e-saat mein paiham karwaTen leta raha

main badalte waqt ki gardish ka paimana raha

shama ne jal kar pareshan kar diya mera wajud

tirgi tak mujh se wabasta mera saya raha

dusron ko jo shikayat mujh se thi beja na thi

main wo hun jis ko KHud apne aap se shikwa raha

zindagi mein jaane kitni bar aa kar Tal gai

wo ajal mein rah jis ki umr bhar takta raha

zauq-e-raij ke mutabiq nit nae pahne libas

zer jama jaisa bosida tha bosida raha

ek lamhe ko mila tha kaif az-KHud raftagi

ek sadi se bhi ziyaada is ka KHamyaza raha

ghair ne jab tak na aaina dikhaya a 'sharosh'

mera chehra KHud meri nazron se poshida raha