shikari raat bhar baiThe rahe unchi machanon par

shikārī raat bhar baiThe rahe ūñchī machānoñ par

musāfir phir bhī lauT aane ko jā pahuñche Thikānoñ par

kisī ne jhāñk kar dekhā na bāhar hī koī aayā

havā ne umr bhar kyā kyā na dastak dī makānoñ par

ḳhud apnā aks-e-ruḳh hai jo kisī ko rok le baḌh kar

vagarna aadmī kab mustaqil Thahrā chaTānoñ par

uThā.e āsmāñ ke dukh bhī kis meñ itnī himmat hai

zamīñ hī ek bhārī hai hameñ to apnī jānoñ par

darīchoñ ne ye manzar aaj pahlī baar dekhā hai

ki tum jaane kahāñ the aur sūraj thā makānoñ par

gharoñ se jab nikal aa.e to sab ne raah lī apnī

magar duniyā kī nazreñ haiñ parindoñ kī uḌānoñ par

havā yuuñ hī to ham ko le ke peḌoñ tak nahīñ aa.ī

hamārā naam thā likkhā huā gandum ke dānoñ par

ye maanā āñdhiyoñ kā haq hai sab par yūrisheñ karnā

magar ye maiñ ki merī aañkh hai ḳhasta makānoñ par

kuchh itne ho ga.e mānūs sannāToñ se ham 'aḳhtar'

guzartī hai girāñ apnī sadā bhī ab to kānoñ par

shikari raat bhar baiThe rahe unchi machanon par

musafir phir bhi lauT aane ko ja pahunche Thikanon par

kisi ne jhank kar dekha na bahar hi koi aaya

hawa ne umr bhar kya kya na dastak di makanon par

KHud apna aks-e-ruKH hai jo kisi ko rok le baDh kar

wagarna aadmi kab mustaqil Thahra chaTanon par

uThae aasman ke dukh bhi kis mein itni himmat hai

zamin hi ek bhaari hai hamein to apni jaanon par

darichon ne ye manzar aaj pahli bar dekha hai

ki tum jaane kahan the aur suraj tha makanon par

gharon se jab nikal aae to sab ne rah li apni

magar duniya ki nazren hain parindon ki uDanon par

hawa yun hi to hum ko le ke peDon tak nahin aai

hamara nam tha likkha hua gandum ke danon par

ye mana aandhiyon ka haq hai sab par yurishen karna

magar ye main ki meri aankh hai KHasta makanon par

kuchh itne ho gae manus sannaTon se hum 'aKHtar'

guzarti hai giran apni sada bhi ab to kanon par