shikast-e-ahd par is ke siwa bahana bhi kya

shikast-e-ahd par is ke sivā bahāna bhī kyā

ki us kā koī nahīñ thā mirā Thikāna bhī kyā

ye sach hai us se bichhaḌ kar mujhe zamāna huā

magar vo lauTnā chāhe to phir zamāna bhī kyā

maiñ har taraf huuñ vo aa.e shikār kar le mujhe

jahāñ hadaf hī hadaf ho to phir nishāna bhī kyā

vo chāhtā hai salīqe se baat karne lagūñ

jo itnī sach ho banegī bhalā fasāna bhī kyā

usī ravish par chalo zindagī guzār aa.eñ

sivā.e is ke kareñ harf ko bahāna bhī kyā

jo lafz bhūlnā chāhūñ vo yaad aatā hai

mirī sazā ke liye aur tāziyāna bhī kyā

ab us galī meñ hai kyā intizām ke laa.eq

to phir risāla-e-dil ko kareñ ravāna bhī kyā

farāz-e-māh bhī pahnā.īyāñ bhī raushan haiñ

charāġh jaltā hai koī tah-e-ḳhazāna bhī kyā

jahāñ bhī jā.ūñ vahī intizār kī sūrat

vo mujh ko chāhe magar itnā vālihāna bhī kyā

mirā vajūd nahīñ ḳhānqāh se bāhar

magar fishār-e-ġhazal meñ ye sūfiyānā bhī kyā

shikast-e-ahd par is ke siwa bahana bhi kya

ki us ka koi nahin tha mera Thikana bhi kya

ye sach hai us se bichhaD kar mujhe zamana hua

magar wo lauTna chahe to phir zamana bhi kya

main har taraf hun wo aae shikar kar le mujhe

jahan hadaf hi hadaf ho to phir nishana bhi kya

wo chahta hai saliqe se baat karne lagun

jo itni sach ho banegi bhala fasana bhi kya

usi rawish par chalo zindagi guzar aaen

siwae is ke karen harf ko bahana bhi kya

jo lafz bhulna chahun wo yaad aata hai

meri saza ke liye aur taziyana bhi kya

ab us gali mein hai kya intizam ke laeq

to phir risala-e-dil ko karen rawana bhi kya

faraaz-e-mah bhi pahnaiyan bhi raushan hain

charagh jalta hai koi tah-e-KHazana bhi kya

jahan bhi jaun wahi intizar ki surat

wo mujh ko chahe magar itna walihana bhi kya

mera wajud nahin KHanqah se bahar

magar fishaar-e-ghazal mein ye sufiyana bhi kya