shikast-e-dil ka fasana suna ke dekhunga

shikast-e-dil kā fasāna sunā ke dekhūñgā

maiñ zarf-e-husn ko bhī aazmā ke dekhūñgā

ajab nahīñ ki isī tarah naam rah jaa.e

tumhārī raah meñ ḳhud ko miTā ke dekhūñgā

na jaane kyoñ nahīñ badle abhī mire hālāt

sharīk-e-hāl ab un ko banā ke dekhūñgā

sunā ye hai ki har ik shai meñ hai tirā jalva

maiñ ab hijāb-e-nazar ko uThā ke dekhūñgā

hañsī ye kyoñ tire hoñToñ pe ab nahīñ aatī

ḳhatā muaaf tujhe gudgudā ke dekhūñgā

sharāb ko na kaheñge ye us ke ba.ad harām

janāb-e-shaiḳh ko ik din pilā ke dekhūñgā

malāl hī to hai ai 'soz' aarzū kā malāl

maiñ ārzūoñ kī sham.eñ bujhā ke dekhūñgā

shikast-e-dil ka fasana suna ke dekhunga

main zarf-e-husn ko bhi aazma ke dekhunga

ajab nahin ki isi tarah nam rah jae

tumhaari rah mein KHud ko miTa ke dekhunga

na jaane kyon nahin badle abhi mere haalat

sharik-e-haal ab un ko bana ke dekhunga

suna ye hai ki har ek shai mein hai tera jalwa

main ab hijab-e-nazar ko uTha ke dekhunga

hansi ye kyon tere honTon pe ab nahin aati

KHata muaf tujhe gudguda ke dekhunga

sharab ko na kahenge ye us ke baad haram

janab-e-shaiKH ko ek din pila ke dekhunga

malal hi to hai ai 'soz' aarzu ka malal

main aarzuon ki shamen bujha ke dekhunga