shikast-e-KHwab-e-tarb-e-za se hosh-mand hua

shikast-e-ḳhvāb-e-tarb-e-zā se hosh-mand huā

uThe jo haath to bāb-e-qubūl band huā

guzar rahā hai junūñ reg-e-āzmā.ish se

kabhī sabā kabhī sarsar kabhī samand huā

karūñ bhī kyā ki nazar āsmāñ pe rahtī hai

maiñ ik sitāra-e-shab kā niyāz-mand huā

ajiib shai hai shafaq-rezī-e-tamannā bhī

ki sair-e-jāñ bhī huī dard bhī do-chand huā

nazar bhaTaktī rahī aur maiñ rahā āzād

nazar jamī to maiñ shāyān-e-qaid-o-band huā

hilā na apnī jagah se na chāk-dāman thā

havā se laḌ ke magar barg-e-arjumand huā

ye iftiḳhār-e-shajar shāḳh-e-nau-bahār se hai

jo pā.emāl-e-ḳhizāñ thā vo sar-buland huā

bahut qarīb thā mujh se mirā harīf na thā

to kyuuñ vo sāhib-e-dil darpai gazand huā

nahīñ hai qāmat-e-bālā se kam mirā qad bhī

vo āsmāñ hai to ho maiñ bhī ḳhud-pasand huā

shikast-e-KHwab-e-tarb-e-za se hosh-mand hua

uThe jo hath to bab-e-qubul band hua

guzar raha hai junun reg-e-azmaish se

kabhi saba kabhi sarsar kabhi samand hua

karun bhi kya ki nazar aasman pe rahti hai

main ek sitara-e-shab ka niyaz-mand hua

ajib shai hai shafaq-rezi-e-tamanna bhi

ki sair-e-jaan bhi hui dard bhi do-chand hua

nazar bhaTakti rahi aur main raha aazad

nazar jami to main shayan-e-qaid-o-band hua

hila na apni jagah se na chaak-daman tha

hawa se laD ke magar barg-e-arjumand hua

ye iftiKHar-e-shajar shaKH-e-nau-bahaar se hai

jo paemal-e-KHizan tha wo sar-buland hua

bahut qarib tha mujh se mera harif na tha

to kyun wo sahib-e-dil darpai gazand hua

nahin hai qamat-e-baala se kam mera qad bhi

wo aasman hai to ho main bhi KHud-pasand hua