shikast kha ke tere gham se kaamyab hua

shikast khā ke tere ġham se kāmyāb huā

dil us maqām pe Duubā ki āftāb huā

sukūn-e-shauq-e-mubaddal ba-iztirāb huā

kisī ne parda kiyā aur maiñ be-naqāb huā

tirī nazar hī to mahfil kī jaan hai saaqī

nigāh tū ne uThā.ī ki inqalāb huā

mirī jabīñ ko dam-e-naz.a chūmne vaale

ġhurūb hone lagā maiñ to āftāb huā

ḳhushī kā koī natīja na ġham kā kuchh hāsil

ye zindagī na huī zindagī kā ḳhvāb huā

na raas aa.ī mujhe zahmat-e-tulū-o-ġhurūb

maiñ zindagī meñ ka.ī baar āftāb huā

kalī ko phuul to bante sabhī ne dekhā hai

kisī ne ye bhī kahā kaun be-naqāb huā

shikast kha ke tere gham se kaamyab hua

dil us maqam pe Duba ki aaftab hua

sukun-e-shauq-e-mubaddal ba-iztirab hua

kisi ne parda kiya aur main be-naqab hua

teri nazar hi to mahfil ki jaan hai saqi

nigah tu ne uThai ki inqalab hua

meri jabin ko dam-e-naza chumne wale

ghurub hone laga main to aaftab hua

KHushi ka koi natija na gham ka kuchh hasil

ye zindagi na hui zindagi ka KHwab hua

na ras aai mujhe zahmat-e-tulu-o-ghurub

main zindagi mein kai bar aaftab hua

kali ko phul to bante sabhi ne dekha hai

kisi ne ye bhi kaha kaun be-naqab hua