shikasta aks tha wo ya ghubar-e-sahra tha

shikasta aks thā vo yā ġhubār-e-sahrā thā

vo maiñ nahīñ thā jo ḳhud apne ghar meñ rahtā thā

ajiib shart-e-safar thī mire liye ki mujhe

siyāh dhuup meñ raushan charāġh rakhnā thā

fasīl-e-sañg se mujh ko utārne aayā

vo ik sitāra jo maiñ ne kabhī na dekhā thā

na jaane kaun se mausam meñ jī rahā thā maiñ

ki merī pyaas thī merī na merā dariyā thā

shajar kī chhāñv se bāhar hai rizq taa.ir kā

vo sāhiloñ pe na Thahrā kabhī jo pyāsā thā

kise pukār rahā thā mirā adhūrā-pan

maiñ garm ret pe taaza gulāb rakhtā thā

hazār kam-suḳhanī darmiyāñ rahī phir bhī

vo mujh se aan milā thā to rañg barsā thā

maiñ bujh gayā to mire jism-o-jāñ khule mujh par

charāġh aur thā koī jo mujh meñ jaltā thā

vo apne ghar meñ ujālā na kar sakā 'jāzib'

tamām raat jo sūraj ke ḳhvāb rakhtā thā

shikasta aks tha wo ya ghubar-e-sahra tha

wo main nahin tha jo KHud apne ghar mein rahta tha

ajib shart-e-safar thi mere liye ki mujhe

siyah dhup mein raushan charagh rakhna tha

fasil-e-sang se mujh ko utarne aaya

wo ek sitara jo main ne kabhi na dekha tha

na jaane kaun se mausam mein ji raha tha main

ki meri pyas thi meri na mera dariya tha

shajar ki chhanw se bahar hai rizq tair ka

wo sahilon pe na Thahra kabhi jo pyasa tha

kise pukar raha tha mera adhura-pan

main garm ret pe taza gulab rakhta tha

hazar kam-suKHani darmiyan rahi phir bhi

wo mujh se aan mila tha to rang barsa tha

main bujh gaya to mere jism-o-jaan khule mujh par

charagh aur tha koi jo mujh mein jalta tha

wo apne ghar mein ujala na kar saka 'jazib'

tamam raat jo suraj ke KHwab rakhta tha