شکستہ چھوڑ کر یہ دل ہمارا

شکستہ چھوڑ کر یہ دل ہمارا

کدھر جاتا رہا قاتل ہمارا

نہیں ہے آپ سے انکار ہم کو

پسند آئے تو لے لو دل ہمارا

جو جی چاہے کرو حاضر ہیں سب میں

تمہارے ہاتھ میں ہے دل ہمارا

نئی ہٹ ہے وہ کہتے ہیں بگڑ کر

تری آغوش میں ہے دل ہمارا

ذرا دیکھو تو آکر رو رہا ہے

ہماری بیکسی پر دل ہمارا

نہ سینہ میں نہ پہلو میں نہ بر میں

الٰہی کس طرف ہے دل ہمارا

کسی پہلو نہیں آرام دیتا

بلائے جاں ہوا ہے دل ہمارا

وہ کیوں کر وصل میں راحت نہ دیتے

مصیبت آشنا تھا دل ہمارا

ذرا دیکھو بھی دکھلا دو رخ اپنا

ترستا دید کو ہے دل ہمارا

نہیں امید آسانی کی تم کو

ہوا مشکل دم مشکل ہمارا

تمہارے لطف سے ہوتا ہے آساں

نہیں عقدہ ہے کچھ مشکل ہمارا

کسی گل پیرہن کی آرزو سے

شگفتہ ہے شگفتہؔ دل ہمارا