shikasta-dil ki KHushi dosto KHushi to na thi

shikasta-dil kī ḳhushī dosto ḳhushī to na thī

hañsī pe vaqt ke ik tanz thā hañsī to na thī

tamām umr jise raushnī samajhte rahe

fareb-e-chashm-e-tamannā thā raushnī to na thī

kisī ke ba.ad jo guzrī kisī kī hasrat meñ

vo ik sazā-e-mohabbat thī zindagī to na thī

jise zamāne ne gul kī hañsī kā naam diyā

vo ek kaifiyat-e-karb thī hañsī to na thī

maiñ tark rasm-e-vafā bevafā se kyuuñ kartā

thā iḳhtilā-e-ḳhayālāt dushmanī to na thī

hañsī hañsī meñ mire dil ko chhīnñe vaale

ye intiqām-e-mohabbat thī dilbarī to na thī

milī thī rāh-e-havas meñ jo raushnī 'sāqī'

vo ek zulmat-e-rahzan thī raushnī to na thī

shikasta-dil ki KHushi dosto KHushi to na thi

hansi pe waqt ke ek tanz tha hansi to na thi

tamam umr jise raushni samajhte rahe

fareb-e-chashm-e-tamanna tha raushni to na thi

kisi ke baad jo guzri kisi ki hasrat mein

wo ek saza-e-mohabbat thi zindagi to na thi

jise zamane ne gul ki hansi ka nam diya

wo ek kaifiyat-e-karb thi hansi to na thi

main tark rasm-e-wafa bewafa se kyun karta

tha iKHtila-e-KHayalat dushmani to na thi

hansi hansi mein mere dil ko chhinne wale

ye intiqam-e-mohabbat thi dilbari to na thi

mili thi rah-e-hawas mein jo raushni 'saqi'

wo ek zulmat-e-rahzan thi raushni to na thi