shikasta-pa hi sahi dur ki sada hi sahi

shikasta-pā hī sahī duur kī sadā hī sahī

bikhar gayā jo havā se vo naqsh-e-pā hī sahī

ye hukm hai ki ga.e mausamoñ ko yaad karūñ

na.ī rutoñ kā tajassus mujhe milā hī sahī

zamīñ ke ba.ad abhī āsmāñ ke dukh bhī sahūñ

mire liye ye sazā hai baḌī atā hī sahī

charāġh kah ke mirā nuur mujh se chhīn liyā

charāġh phir bhī rahūñgā bujhā huā hī sahī

sajā liye haiñ masā.ib ke niir āñkhoñ meñ

sukūñ kī niiñd nahīñ hai to ratjagā hī sahī

ai dhaḌkanoñ ko nayā nuur baḳhshne vaale

maiñ nuur se hī tahī tū mirī ḳhatā hī sahī

haqīqatoñ ke badan par koī labāda nahīñ

agar ye sach kī sazā hai to phir sazā hī sahī

ye dil kā karb laboñ tak kabhī na aa.egā

mire liye ye ḳhamoshī kā irtiqā hī sahī

jahāñ ke dard ko 'anvār' ne sameT liyā

maiñ ik ḳhushī kī tamannā meñ mar-miTā hī sahī

shikasta-pa hi sahi dur ki sada hi sahi

bikhar gaya jo hawa se wo naqsh-e-pa hi sahi

ye hukm hai ki gae mausamon ko yaad karun

nai ruton ka tajassus mujhe mila hi sahi

zamin ke baad abhi aasman ke dukh bhi sahun

mere liye ye saza hai baDi ata hi sahi

charagh kah ke mera nur mujh se chhin liya

charagh phir bhi rahunga bujha hua hi sahi

saja liye hain masaib ke nir aankhon mein

sukun ki nind nahin hai to ratjaga hi sahi

ai dhaDkanon ko naya nur baKHshne wale

main nur se hi tahi tu meri KHata hi sahi

haqiqaton ke badan par koi labaada nahin

agar ye sach ki saza hai to phir saza hi sahi

ye dil ka karb labon tak kabhi na aaega

mere liye ye KHamoshi ka irtiqa hi sahi

jahan ke dard ko 'anwar' ne sameT liya

main ek KHushi ki tamanna mein mar-miTa hi sahi