shikwa aghyar ka hai mere sunane ke liye

shikva aġhyār kā hai mere sunāne ke liye

chāhiye roz na.ī chheḌ satāne ke liye

surma sā jo mujhe āñkhoñ meñ jagah dete the

aaj aa.e haiñ vo miTTī meñ milāne ke liye

kaash dam bhar ko palaT aa.e hayāt-e-rafta

merī mayyat pe vo aa.e haiñ jilāne ke liye

kunj-e-zindāñ meñ idhar ham haiñ udhar mausam-e-gul

aa gayā aur bhī dīvāna banāne ke liye

sīna-e-mahr meñ sozish hai dil-e-māh meñ daaġh

āfat-e-jāñ hai ġham-e-ishq zamāne ke liye

'nūr' jab jānūñ ḳhayāl un kā jagā le mujh ko

maut aa.ī hai mujhe aaj sulāne ke liye

shikwa aghyar ka hai mere sunane ke liye

chahiye roz nai chheD satane ke liye

surma sa jo mujhe aankhon mein jagah dete the

aaj aae hain wo miTTi mein milane ke liye

kash dam bhar ko palaT aae hayat-e-rafta

meri mayyat pe wo aae hain jilane ke liye

kunj-e-zindan mein idhar hum hain udhar mausam-e-gul

aa gaya aur bhi diwana banane ke liye

sina-e-mahr mein sozish hai dil-e-mah mein dagh

aafat-e-jaan hai gham-e-ishq zamane ke liye

'nur' jab jaanun KHayal un ka jaga le mujh ko

maut aai hai mujhe aaj sulane ke liye