shikwa na baKHt se hai ne aasman se mujhko

shikva na baḳht se hai ne āsmāñ se mujh ko

pahuñchī jo kuchh aziyyat apne gumāñ se mujh ko

qāsid kahe to hai tū pūchhe thā haal terā

tasdīq is kī lekin hove kahāñ se mujh ko

āshiq na thā maiñ bulbul kuchh gul ke rañg-o-bū kā

ik uns ho gayā thā is gulsitāñ se mujh ko

jaatā huuñ jis jagah ab vaañ ḳhānumāñ hai merā

khoyā hai ai falak tiiñ go ḳhānumāñ se mujh ko

bā-vasf-e-be-kamālī izzat-talab huuñ 'qā.em'

darḳhur na ho so kyūñ-kar ahl-e-jahāñ se mujh ko

shikwa na baKHt se hai ne aasman se mujh ko

pahunchi jo kuchh aziyyat apne guman se mujh ko

qasid kahe to hai tu puchhe tha haal tera

tasdiq is ki lekin howe kahan se mujh ko

aashiq na tha main bulbul kuchh gul ke rang-o-bu ka

ek uns ho gaya tha is gulsitan se mujh ko

jata hun jis jagah ab wan KHanuman hai mera

khoya hai ai falak tin go KHanuman se mujh ko

ba-wasf-e-be-kamali izzat-talab hun 'qaem'

darKHur na ho so kyun-kar ahl-e-jahan se mujh ko