shikwe tere huzur kiye ja raha hun main

shikve tire huzūr kiye jā rahā huuñ maiñ

jo kuchh bhī ho qusūr kiye jā rahā huuñ maiñ

vahm-e-ta.ayyunāt kā anjām dekhnā

nazdīkiyoñ ko duur kiye jā rahā huuñ maiñ

mahv-e-tavāf kūcha-e-hastī meñ rahmateñ

shāyad koī qusūr kiye jā rahā huuñ maiñ

rakkhī huī hai sañg-e-dar-e-yār par jabīñ

is ijz par ġhurūr kiye jā rahā huuñ maiñ

nazr-e-nigāh-e-nāz haiñ dil kī nazākateñ

shīshe ko chuur chuur kiye jā rahā huuñ maiñ

rabt-e-niyāz-o-nāz kā aalam to dekhnā

nādim haiñ vo qusūr kiye jā rahā huuñ maiñ

sochā kabhī na hazrat-e-vā.iz ne ye 'shakīl'

rindoñ meñ zikr-e-hūr kiye jā rahā huuñ maiñ

shikwe tere huzur kiye ja raha hun main

jo kuchh bhi ho qusur kiye ja raha hun main

wahm-e-tayyunat ka anjam dekhna

nazdikiyon ko dur kiye ja raha hun main

mahw-e-tawaf kucha-e-hasti mein rahmaten

shayad koi qusur kiye ja raha hun main

rakkhi hui hai sang-e-dar-e-yar par jabin

is ijz par ghurur kiye ja raha hun main

nazr-e-nigah-e-naz hain dil ki nazakaten

shishe ko chur chur kiye ja raha hun main

rabt-e-niyaz-o-naz ka aalam to dekhna

nadim hain wo qusur kiye ja raha hun main

socha kabhi na hazrat-e-waiz ne ye 'shakil'

rindon mein zikr-e-hur kiye ja raha hun main