shohra-e-afaq mujh sa kaun sa diwana hai

shohra-e-āfāq mujh sā kaun sā dīvāna hai

hind meñ maiñ huuñ paristāñ meñ mirā afsāna hai

said-gāh-e-murġh-e-dil ruḳhsāra-e-jānāna hai

dām-e-zulf-e-ambarīñ hai ḳhāl-e-mushkīñ daana hai

husn se rutba hai apne ishq-e-kāmil kā buland

āstāna par parī hai baam par dīvāna hai

is meñ rahtā hai safā-e-rū-e-jānāñ kā ḳhayāl

dil nahīñ pahlū meñ apne ā.īna kā ḳhāna hai

bechtā huuñ dil ko jo mahbūb chāhe mol le

bosa qīmat hai tavajjoh kī nazar bai.āna hai

phūTeñ vo āñkheñ nigāh-e-bad se jo dekheñ tujhe

ātishīñ ruḳhsār mijmar ḳhaal kaalā daana hai

roz-o-shab us sham.a-rū ko bhejtā huuñ ḳhatt-e-shauq

nāma-bar din ko kabūtar raat ko parvāna hai

ḳhaar ḳhār-e-dil ġhanīmat jāntā huuñ ishq meñ

zulf-e-dūd-e-āh kī ārastagī kāshāna hai

sharh likkhā chāhiye us kī bayāz-e-sub.h par

matla-e-ḳhurshīd bait-e-abrū-e-jānāna hai

hālat-e-ā.īna rakhtā hai safā se dil mirā

āshnā se āshnā begāna se begāna hai

qatl se mujh saḳht-jāñ ke munkir ai qātil na ho

hujjat-e-qāte tirī talvār kā dandāna hai

vāste har shai ke duniyā meñ muqarrar haiñ mahal

shahr meñ jab tak hai majnūñ ganj-e-be-vīrānā hai

bāġh-e-ālam meñ nahīñ us shoḳh sā koī hasīñ

gul hai apnā yaar yūsuf sabza-e-begāna hai

ab nahīñ ai yaar jauban ko tire bīm-e-zavāl

ḳhatt-e-mushkīñ husn kī jāgīr kā parvāna hai

haal hai jis kā usī ke vāste hai ḳhushnumā

naqs hai talvār kā vasf arrā kā dandāna hai

yaar khīñche teġh tere qatl karne ke liye

sar jhukā 'ātish' ye jā-e-sajda-e-shukrāna hai

shohra-e-afaq mujh sa kaun sa diwana hai

hind mein main hun paristan mein mera afsana hai

said-gah-e-murgh-e-dil ruKHsara-e-jaanana hai

dam-e-zulf-e-ambarin hai KHal-e-mushkin dana hai

husn se rutba hai apne ishq-e-kaamil ka buland

aastana par pari hai baam par diwana hai

is mein rahta hai safa-e-ru-e-jaanan ka KHayal

dil nahin pahlu mein apne aaina ka KHana hai

bechta hun dil ko jo mahbub chahe mol le

bosa qimat hai tawajjoh ki nazar baiana hai

phuTen wo aankhen nigah-e-bad se jo dekhen tujhe

aatishin ruKHsar mijmar KHal kala dana hai

roz-o-shab us shama-ru ko bhejta hun KHatt-e-shauq

nama-bar din ko kabutar raat ko parwana hai

KHar KHar-e-dil ghanimat jaanta hun ishq mein

zulf-e-dud-e-ah ki aarastagi kashana hai

sharh likkha chahiye us ki bayaz-e-subh par

matla-e-KHurshid bait-e-abru-e-jaanana hai

haalat-e-aina rakhta hai safa se dil mera

aashna se aashna begana se begana hai

qatl se mujh saKHt-jaan ke munkir ai qatil na ho

hujjat-e-qate teri talwar ka dandana hai

waste har shai ke duniya mein muqarrar hain mahal

shahr mein jab tak hai majnun ganj-e-be-virana hai

bagh-e-alam mein nahin us shoKH sa koi hasin

gul hai apna yar yusuf sabza-e-begana hai

ab nahin ai yar jauban ko tere bim-e-zawal

KHatt-e-mushkin husn ki jagir ka parwana hai

haal hai jis ka usi ke waste hai KHushnuma

naqs hai talwar ka wasf arra ka dandana hai

yar khinche tegh tere qatl karne ke liye

sar jhuka 'atish' ye ja-e-sajda-e-shukrana hai