shoKHi-o-naz juda rang juda mange hai

shoḳhī-o-nāz judā rang judā māñge hai

nāzukī husn kī phūloñ kī adā māñge hai

sochtā huuñ ki milā kyā hai ḳhudā ke dar se

saañs lene ko bhī insān havā māñge hai

'ahd-e-hāzir meñ vo bohtāt hai ranj-o-ġham kī

banda ghabrā ke koī aur ḳhudā māñge hai

ek sajde ko bhī tayyār nahīñ dil merā

dar magar rahmat-e-yazdāñ kā khulā māñge hai

dekh kis haal ko pahuñchā hai ye bīmār-e-alam

chārāgar muñh ko take hai jo davā māñge hai

bū-e-gul dekh kahīñ terī zarūrat to nahīñ

chheḌ kar zulf ko kuchh bād-e-sabā māñge hai

ai falak ḳhud ko sañbhālūñ ki bachā.ūñ kashtī

hosh kyā jaañ bhī mirī mauj-e-balā māñge hai

shoKHi-o-naz juda rang juda mange hai

nazuki husn ki phulon ki ada mange hai

sochta hun ki mila kya hai KHuda ke dar se

sans lene ko bhi insan hawa mange hai

'ahd-e-hazir mein wo bohtat hai ranj-o-gham ki

banda ghabra ke koi aur KHuda mange hai

ek sajde ko bhi tayyar nahin dil mera

dar magar rahmat-e-yazdan ka khula mange hai

dekh kis haal ko pahuncha hai ye bimar-e-alam

chaaragar munh ko take hai jo dawa mange hai

bu-e-gul dekh kahin teri zarurat to nahin

chheD kar zulf ko kuchh baad-e-saba mange hai

ai falak KHud ko sanbhaalun ki bachaun kashti

hosh kya jaan bhi meri mauj-e-bala mange hai