shor-e-dil mein us taraf ki KHamushi se bach gai

shor-e-dil meñ us taraf kī ḳhāmushī se bach ga.ī

ik mohabbat phir kisī dīvāngī se bach ga.ī

vo gumāñ us kā ki hai ḳhushiyoñ kī manzil koī aur

ranj ye merā ki vo apnī ḳhushī se bach ga.ī

jism-o-jāñ ko raushan-o-sarshār kartī ik khanak

maiñ liye phirtā huuñ jo us kī hañsī se bach ga.ī

maiñ ne jaanā ab huā har aag se ḳhālī ye dil

ik ye chingārī kahāñ is phuljhaḌī se bach ga.ī

nit-na.e raste banā letā hai sailāb-e-balā

kaun sī bastī hai jo ġhārat-garī se bach ga.ī

din vo achchhā jis meñ ujyāle kā mailā-pan na ho

raat vo achchhī jo kaalī raushnī se bach ga.ī

ik zamāne meñ baḌā shohrā thā merī 'aql kā

ab to bas vo hai jo zo’m-e-āgahī se bach ga.ī

she'r kyoñ kahte ho 'āzam' ye suḳhan kis ke liye

ab ġhazal maqbūl hai jo shā'irī se bach ga.ī

shor-e-dil mein us taraf ki KHamushi se bach gai

ek mohabbat phir kisi diwangi se bach gai

wo guman us ka ki hai KHushiyon ki manzil koi aur

ranj ye mera ki wo apni KHushi se bach gai

jism-o-jaan ko raushan-o-sarshaar karti ek khanak

main liye phirta hun jo us ki hansi se bach gai

main ne jaana ab hua har aag se KHali ye dil

ek ye chingari kahan is phuljhaDi se bach gai

nit-nae raste bana leta hai sailab-e-bala

kaun si basti hai jo ghaarat-gari se bach gai

din wo achchha jis mein ujyale ka maila-pan na ho

raat wo achchhi jo kali raushni se bach gai

ek zamane mein baDa shohra tha meri 'aql ka

ab to bas wo hai jo zo’m-e-agahi se bach gai

she'r kyon kahte ho 'azam' ye suKHan kis ke liye

ab ghazal maqbul hai jo sha'iri se bach gai