shor kaisa hai mere dil ke KHarabe se uTha

shor kaisā hai mire dil ke ḳharābe se uThā

shahr jaise ki koī apne hī malbe se uThā

yā uThā dasht meñ dīvāne se bār-e-furqat

yā tire shahr meñ ik chāhne vaale se uThā

yā mirī ḳhaak ko mil jaane de is miTTī meñ

yā mujhe ḳhuun kī lalkār pe kūche se uThā

tū mire paas nahīñ hotā ye sach hai lekin

tirī āvāz par har sub.h meñ sote se uThā

chaak pe rakkhā hai to lams bhī de hāthoñ kā

merī pahchān ta.attul ke andhere se uThā

dil ki hai ḳhuun kā ik qatra magar duniyā meñ

jab uThā hashr isī ek ilāqe se uThā

ye ujāloñ kī ināyat hai ki banda-e-'ash.har'

apne saa.e pe girā apne hī saa.e se uThā

shor kaisa hai mere dil ke KHarabe se uTha

shahr jaise ki koi apne hi malbe se uTha

ya uTha dasht mein diwane se bar-e-furqat

ya tere shahr mein ek chahne wale se uTha

ya meri KHak ko mil jaane de is miTTi mein

ya mujhe KHun ki lalkar pe kuche se uTha

tu mere pas nahin hota ye sach hai lekin

teri aawaz par har subh mein sote se uTha

chaak pe rakkha hai to lams bhi de hathon ka

meri pahchan tattul ke andhere se uTha

dil ki hai KHun ka ek qatra magar duniya mein

jab uTha hashr isi ek ilaqe se uTha

ye ujalon ki inayat hai ki banda-e-'ashhar'

apne sae pe gira apne hi sae se uTha