shor-o-ghul aahen karahen aur alam paiham tha shad

shor-o-ġhul aaheñ karāheñ aur alam paiham thā 'shād'

raat mere dil kī bastī kā ajab mausam thā 'shād'

barq-o-bārāñ kī nazar mujh par rahī āThoñ pahar

kyoñ mire hī āshiyāñ par āsmāñ barham thā 'shād'

saañs lenā bhī girāñ thā nā-tavānī par mirī

hijr kā aalam bhī jaise naza.a kā aalam thā 'shād'

bādaloñ kī aaḌ se koī muḳhātib thā magar

lafz be-ma.anī the aur lahja bhī kuchh mub.ham thā 'shād'

mere dil par thī musallat vahshatoñ kī tīrgī

par ināyat kā charāġhāñ bhī zarā kam kam thā 'shād'

āñsuoñ se tar milā har shaḳhs kā dāman vahāñ

har kisī ke dil meñ pinhāñ jaise koī ġham thā 'shād'

apnī baḳhshish ke liye thā har koī koshāñ vahāñ

maiñ bhī saf meñ thā magar bā-dīda-e-pur-nam thā 'shād'

shor-o-ghul aahen karahen aur alam paiham tha 'shad'

raat mere dil ki basti ka ajab mausam tha 'shad'

barq-o-baran ki nazar mujh par rahi aaThon pahar

kyon mere hi aashiyan par aasman barham tha 'shad'

sans lena bhi giran tha na-tawani par meri

hijr ka aalam bhi jaise naza ka aalam tha 'shad'

baadalon ki aaD se koi muKHatib tha magar

lafz be-mani the aur lahja bhi kuchh mubham tha 'shad'

mere dil par thi musallat wahshaton ki tirgi

par inayat ka charaghan bhi zara kam kam tha 'shad'

aansuon se tar mila har shaKHs ka daman wahan

har kisi ke dil mein pinhan jaise koi gham tha 'shad'

apni baKHshish ke liye tha har koi koshan wahan

main bhi saf mein tha magar ba-dida-e-pur-nam tha 'shad'