sikh liya jina maine

siikh liyā jiinā maiñ ne

itnā zahr piyā maiñ ne

shikva nahīñ kiyā maiñ ne

aañsū poñchh liyā maiñ ne

un se mil kar aayā huuñ

ḳhvāb nahīñ dekhā maiñ ne

havā ko aate jab dekhā

raushan kiyā diyā maiñ ne

pyāsā thā kartā bhī kyā

likh Daalā dariyā maiñ ne

parcham sā lahrāyā huuñ

khaa.ī tez havā maiñ ne

husn-e-chaman likhtā kaise

paḌhā na ik pattā maiñ ne

dīvāroñ kī bastī meñ

darvāza likkhā maiñ ne

paash paash huā phir bhī

sar ūñchā rakkhā maiñ ne

kisī ko kyā denā 'hashmī'

qarz hī kiye adā maiñ ne

sikh liya jina main ne

itna zahr piya main ne

shikwa nahin kiya main ne

aansu ponchh liya main ne

un se mil kar aaya hun

KHwab nahin dekha main ne

hawa ko aate jab dekha

raushan kiya diya main ne

pyasa tha karta bhi kya

likh Dala dariya main ne

parcham sa lahraya hun

khai tez hawa main ne

husn-e-chaman likhta kaise

paDha na ek patta main ne

diwaron ki basti mein

darwaza likkha main ne

pash pash hua phir bhi

sar uncha rakkha main ne

kisi ko kya dena 'hashmi'

qarz hi kiye ada main ne