sim-o-zar chahe na almas-o-guhar mange hai

sīm-o-zar chāhe na almās-o-guhar māñge hai

dil to darvesh hai ulfat kī nazar māñge hai

jab ġhazal mujh se koī misra-e-tar māñge hai

kāvish-e-fikr mirā ḳhūn-e-jigar māñge hai

dil ko hai āfiyat-e-anjuman-e-gul kī talab

zindagī dasht-e-muġhīlāñ kā safar māñge hai

mujh ko le jaa.e jo anjāne dayāroñ kī taraf

merī āvāra-mizājī vo Dagar māñge hai

apne māhaul se har shaḳhs hai mā.il-ba-farār

koī bezār hai ghar se koī ghar māñge hai

the jo rañgīnī-e-dāmān-e-nazar kā sāmāñ

dīda-e-shauq vahī shām-o-sahar māñge hai

kal bhī jāñ-bāz hī karte the nigah-dārī-e-haq

ye junūñ aaj bhī nazrāna-e-sar māñge hai

ho jahāñ aib-shumārī hī parakh kā mafhūm

sābir us shahr meñ kyā dād-e-hunar māñge hai

sim-o-zar chahe na almas-o-guhar mange hai

dil to darwesh hai ulfat ki nazar mange hai

jab ghazal mujh se koi misra-e-tar mange hai

kawish-e-fikr mera KHun-e-jigar mange hai

dil ko hai aafiyat-e-anjuman-e-gul ki talab

zindagi dasht-e-mughilan ka safar mange hai

mujh ko le jae jo anjaane dayaron ki taraf

meri aawara-mizaji wo Dagar mange hai

apne mahaul se har shaKHs hai mail-ba-farar

koi bezar hai ghar se koi ghar mange hai

the jo rangini-e-daman-e-nazar ka saman

dida-e-shauq wahi sham-o-sahar mange hai

kal bhi jaan-baz hi karte the nigah-dari-e-haq

ye junun aaj bhi nazrana-e-sar mange hai

ho jahan aib-shumari hi parakh ka mafhum

sabir us shahr mein kya dad-e-hunar mange hai