sine ke zaKHm panw ke chhaale kahan gae

siine ke zaḳhm paañv ke chhāle kahāñ ga.e

ai husn tere chāhne vaale kahāñ ga.e

shānoñ ko chhīn chhīn ke pheñkā gayā kahāñ

ā.īne toḌ-phoḌ ke Daale kahāñ ga.e

ḳhalvat meñ raushnī hai na mahfil meñ raushnī

ahl-e-vafā charāġh-e-vafā le kahāñ ga.e

but-ḳhāne meñ bhī Dher haiñ TukḌe haram meñ bhī

jām-o-subū kahāñ the uchhāle kahāñ ga.e

āñkhoñ se āñsuoñ ko milī ḳhaak meñ jagah

paale kahāñ ga.e the nikāle kahāñ ga.e

barbād-e-rozgār hamārā hī naam hai

aa.eñ tamāshā dekhne vaale kahāñ ga.e

chhupte ga.e diloñ meñ vo ban kar ġhazal ke bol

maiñ DhūñDhtā rahā mire naale kahāñ ga.e

uThte huoñ ko sab ne sahārā diyā 'kalīm'

girte hue ġharīb sambhāle kahāñ ga.e

sine ke zaKHm panw ke chhaale kahan gae

ai husn tere chahne wale kahan gae

shanon ko chhin chhin ke phenka gaya kahan

aaine toD-phoD ke Dale kahan gae

KHalwat mein raushni hai na mahfil mein raushni

ahl-e-wafa charagh-e-wafa le kahan gae

but-KHane mein bhi Dher hain TukDe haram mein bhi

jam-o-subu kahan the uchhaale kahan gae

aankhon se aansuon ko mili KHak mein jagah

pale kahan gae the nikale kahan gae

barbaad-e-rozgar hamara hi nam hai

aaen tamasha dekhne wale kahan gae

chhupte gae dilon mein wo ban kar ghazal ke bol

main DhunDhta raha mere nale kahan gae

uThte huon ko sab ne sahaara diya 'kalim'

girte hue gharib sambhaale kahan gae