sine mein jo hai dard ka dariya nahin utra

siine meñ jo hai dard kā dariyā nahīñ utrā

lekin mirī ummīd kā chehra nahīñ utrā

anjāne meñ ik baar koī bhuul huī thī

ab tak mire ahbāb kā ġhussa nahīñ utrā

sarmāya-e-jāñ haath se jaatā rahā lekin

is ‘ishq-e-junūñ-ḳhez kā qarza nahīñ utrā

batlātī hai ye naqsh-e-kaf-e-pā kī ravānī

maiñ dasht-e-tamannā meñ akelā nahīñ utrā

koshish to mire zauq-e-tajassus ne bahut kī

lekin kisī chehre se bhī chehra nahīñ utrā

kachre se uThā.ī jo kisī tifl ne roTī

phir halq se mere koī luqma nahīñ utrā

sine mein jo hai dard ka dariya nahin utra

lekin meri ummid ka chehra nahin utra

anjaane mein ek bar koi bhul hui thi

ab tak mere ahbab ka ghussa nahin utra

sarmaya-e-jaan hath se jata raha lekin

is ‘ishq-e-junun-KHez ka qarza nahin utra

batlati hai ye naqsh-e-kaf-e-pa ki rawani

main dasht-e-tamanna mein akela nahin utra

koshish to mere zauq-e-tajassus ne bahut ki

lekin kisi chehre se bhi chehra nahin utra

kachre se uThai jo kisi tifl ne roTi

phir halq se mere koi luqma nahin utra