sine mein koi aag ka gola hai ki dil hai

siine meñ koī aag kā golā hai ki dil hai

javvāla hai sho'la hai sharāra hai ki dil hai

yādoñ kā lagā mela jhamelā hai ki dil hai

ġhauġhā hai ki balva hai tamāsha hai ki dil hai

be-gor kafan lāshoñ kī tasvīreñ sajī haiñ

zindān hai maqtal hai kamelā hai ki dil hai

be-samt jo yādoñ ke uḌe jaate haiñ panchhī

tūfān hai āñdhī hai bagūla hai ki dil hai

TuuTī huī qabreñ haiñ to hasrat-zada katbe

āsār-e-qadīma kā ye naqsha hai ki dil hai

zanjīr-zanī hai to kahīñ marsiya-ḳhvānī

ye mātamī dasta hai janāza hai ki dil hai

suntā huuñ ki dil jaisī koī shai nahīñ mujh meñ

jab haath meñ rakhtā huuñ to lagtā hai ki dil hai

lagtā hī nahīñ 'shams' tire dil kā kahīñ mol

nākāra mashīnī koī purza hai ki dil hai

sine mein koi aag ka gola hai ki dil hai

jawwala hai sho'la hai sharara hai ki dil hai

yaadon ka laga mela jhamela hai ki dil hai

ghaugha hai ki balwa hai tamasha hai ki dil hai

be-gor kafan lashon ki taswiren saji hain

zindan hai maqtal hai kamela hai ki dil hai

be-samt jo yaadon ke uDe jate hain panchhi

tufan hai aandhi hai bagula hai ki dil hai

TuTi hui qabren hain to hasrat-zada katbe

aasar-e-qadima ka ye naqsha hai ki dil hai

zanjir-zani hai to kahin marsiya-KHwani

ye matami dasta hai janaza hai ki dil hai

sunta hun ki dil jaisi koi shai nahin mujh mein

jab hath mein rakhta hun to lagta hai ki dil hai

lagta hi nahin 'shams' tere dil ka kahin mol

nakara mashini koi purza hai ki dil hai