sine mein un ke jalwe chhupae hue to hain

siine meñ un ke jalve chhupā.e hue to haiñ

ham apne dil ko tuur banā.e hue to haiñ

tāsīr-e-jazb-e-shauq dikhā.e hue to haiñ

ham terā har hijāb uThā.e hue to haiñ

haañ kyā huā vo hausla-e-dīd-e-ahl-e-dil

dekho nā vo naqāb uThā.e hue to haiñ

tere gunāhgār gunahgār hī sahī

tere karam kī aas lagā.e hue to haiñ

allāh-rī kāmyābī-e-āvārgān-e-ishq

ḳhud gum hue to kyā use paa.e hue to haiñ

yuuñ tujh ko iḳhtiyār hai tāsīr de na de

dast-e-du'ā ham aaj uThā.e hue to haiñ

zikr un kā gar zabāñ pe nahīñ hai to kyā huā

ab tak nafas nafas meñ samā.e hue to haiñ

miTte huoñ ko dekh ke kyuuñ ro na deñ 'majāz'

āḳhir kisī ke ham bhī miTā.e hue to haiñ

sine mein un ke jalwe chhupae hue to hain

hum apne dil ko tur banae hue to hain

tasir-e-jazb-e-shauq dikhae hue to hain

hum tera har hijab uThae hue to hain

han kya hua wo hausla-e-did-e-ahl-e-dil

dekho na wo naqab uThae hue to hain

tere gunahgar gunahgar hi sahi

tere karam ki aas lagae hue to hain

allah-ri kaamyabi-e-awargan-e-ishq

KHud gum hue to kya use pae hue to hain

yun tujh ko iKHtiyar hai tasir de na de

dast-e-du'a hum aaj uThae hue to hain

zikr un ka gar zaban pe nahin hai to kya hua

ab tak nafas nafas mein samae hue to hain

miTte huon ko dekh ke kyun ro na den 'majaz'

aaKHir kisi ke hum bhi miTae hue to hain