sikka-e-dagh-e-junun milte jo daulat mangta

sikka-e-dāġh-e-junūñ milte jo daulat māñgtā

tañg kartī muflisī gar maiñ farāġhat māñgtā

rañj se fursat na miltī maiñ jo rāhat māñgtā

bojh hotā sar pe gar qārūñ kī daulat māñgtā

gar mujhe hotī ḳhabar merā masīhā aa.egā

ai ajal ik dam kī maiñ bhī tujh se mohlat māñgtā

ḳhizr kī sī zindagī hotī jo mujh nākām kī

maiñ duā-e-vasl-e-jānāñ tā-qayāmat māñgtā

ashk ke dariyā ne rakh lī aabrū ai chashm-e-tar

marte dam do gaz zamīn kyā bahr-e-turbat māñgtā

kis kī aamad aamad apne kalba-e-ahzāñ meñ hai

peshvā.ī ko hai dil pahlū se ruḳhsat māñgtā

dar-guzartā jaan tak kartā zamīñ us se aziiz

mujh se darbān-e-dar-e-jānāñ jo rishvat māñgtā

naza.a tak dīdār kī hasrat rahī mushtāq ko

ai masīhā mar gayā bīmār sharbat māñgtā

dar-ba-dar phirne ne merī qadr khoī ai falak

un ke dil meñ hai jagah miltī jo ḳhalvat māñgtā

minnateñ kar ke chhuḌātā bulbuloñ ko daam se

maiñ zar-e-gul detā agar sayyād qīmat māñgtā

ādamiyyat se haiñ duur in zāhidoñ ke qaul-o-fe.al

haqq-e-maurūsī thā merā kyuuñ maiñ jannat māñgtā

jaan dī nāhaq ko makkāra ke dam meñ aan kar

kohkan shīrīñ se mehnat kī jo ujrat māñgtā

qasd kartā gar bulandī kā to pastī dekhtā

kund ho jaatī tabī.at gar maiñ jaudat māñgtā

zulf ke janjāl meñ phañsne kī ḳhud kartā duā

maiñ siḌī thā jo ḳhudā se apnī shāmat māñgtā

qaa.el apnī guftugū se ḳhaas kā hotā kalīm

'sa.adī'-e-shīrāz bhī mujh se fasāhat māñgtā

yaar hotā baaġh hotā aise gar hote nasīb

mai-kashī kī mohtasib se maiñ ijāzat māñgtā

dasht-e-vahshat-ḳhez meñ uryāñ hai 'āġhā' aap hī

qāsid-e-jānāñ ko kyā detā jo ḳhil.at māñgtā

sikka-e-dagh-e-junun milte jo daulat mangta

tang karti muflisi gar main faraghat mangta

ranj se fursat na milti main jo rahat mangta

bojh hota sar pe gar qarun ki daulat mangta

gar mujhe hoti KHabar mera masiha aaega

ai ajal ek dam ki main bhi tujh se mohlat mangta

KHizr ki si zindagi hoti jo mujh nakaam ki

main dua-e-wasl-e-jaanan ta-qayamat mangta

ashk ke dariya ne rakh li aabru ai chashm-e-tar

marte dam do gaz zamin kya bahr-e-turbat mangta

kis ki aamad aamad apne kalba-e-ahzan mein hai

peshwai ko hai dil pahlu se ruKHsat mangta

dar-guzarta jaan tak karta zamin us se aziz

mujh se darban-e-dar-e-jaanan jo rishwat mangta

naza tak didar ki hasrat rahi mushtaq ko

ai masiha mar gaya bimar sharbat mangta

dar-ba-dar phirne ne meri qadr khoi ai falak

un ke dil mein hai jagah milti jo KHalwat mangta

minnaten kar ke chhuData bulbulon ko dam se

main zar-e-gul deta agar sayyaad qimat mangta

aadamiyyat se hain dur in zahidon ke qaul-o-feal

haqq-e-maurusi tha mera kyun main jannat mangta

jaan di nahaq ko makkara ke dam mein aan kar

kohkan shirin se mehnat ki jo ujrat mangta

qasd karta gar bulandi ka to pasti dekhta

kund ho jati tabiat gar main jaudat mangta

zulf ke janjal mein phansne ki KHud karta dua

main siDi tha jo KHuda se apni shamat mangta

qael apni guftugu se KHas ka hota kalim

'sadi'-e-shiraaz bhi mujh se fasahat mangta

yar hota bagh hota aise gar hote nasib

mai-kashi ki mohtasib se main ijazat mangta

dasht-e-wahshat-KHez mein uryan hai 'agha' aap hi

qasid-e-jaanan ko kya deta jo KHilat mangta