silsila chhiD gaya jab yas ke afsane ka

silsila chhiḌ gayā jab 'yās' ke afsāne kā

sham.a gul ho ga.ī dil bujh gayā parvāne kā

ishq se dil ko milā ā.ina-ḳhāne kā sharaf

jagmagā uTThā kañval apne siyah-ḳhāne kā

ḳhalvat-e-nāz kujā aur kujā ahl-e-havas

zor kyā chal sake fānūs se parvāne kā

laash kam-baḳht kī ka.abe meñ koī phikvā de

kūcha-e-yār meñ kyuuñ Dher ho parvāne kā

vaa.e hasrat ki ta.alluq na huā dil ko kahīñ

na to ka.abe kā huā maiñ na sanam-ḳhāne kā

tishna-lab saath chale shauq meñ saa.e kī tarah

ruḳh kiyā abr-e-bahārī ne jo mai-ḳhāne kā

vaah kis naaz se aatā hai tirā daur-e-shabāb

jis tarah daur chale bazm meñ paimāne kā

ahl-e-dil mast hue phail ga.ī bū-e-vafā

pairahan chaak huā jab tire dīvāne kā

sar-e-shorīda kujā ishq kī begār kujā

magar allāh re dil aap ke dīvāne kā

dekh kar aa.ine meñ chāk-e-garebāñ kī bahār

aur bigḌā hai mizāj aap ke dīvāne kā

kyā ajab hai jo hasīnoñ kī nazar lag jaa.e

ḳhuun halkā hai bahut aap ke dīvāne kā

aap ab sham-e-sahar baḌh ke gale miltī hai

baḳht jaagā hai baḌī der meñ parvāne kā

dil-e-be-hausla taktā hai ḳharīdār kī raah

koī gāhak nahīñ TuuTe hue paimāne kā

bazm meñ sub.h huī chhā gayā ik sannāTā

silsila chhiḌ gayā jab aap ke afsāne kā

silsila chhiD gaya jab 'yas' ke afsane ka

shama gul ho gai dil bujh gaya parwane ka

ishq se dil ko mila aaina-KHane ka sharaf

jagmaga uTTha kanwal apne siyah-KHane ka

KHalwat-e-naz kuja aur kuja ahl-e-hawas

zor kya chal sake fanus se parwane ka

lash kam-baKHt ki kabe mein koi phikwa de

kucha-e-yar mein kyun Dher ho parwane ka

wae hasrat ki talluq na hua dil ko kahin

na to kabe ka hua main na sanam-KHane ka

tishna-lab sath chale shauq mein sae ki tarah

ruKH kiya abr-e-bahaari ne jo mai-KHane ka

wah kis naz se aata hai tera daur-e-shabab

jis tarah daur chale bazm mein paimane ka

ahl-e-dil mast hue phail gai bu-e-wafa

pairahan chaak hua jab tere diwane ka

sar-e-shorida kuja ishq ki begar kuja

magar allah re dil aap ke diwane ka

dekh kar aaine mein chaak-e-gareban ki bahaar

aur bigDa hai mizaj aap ke diwane ka

kya ajab hai jo hasinon ki nazar lag jae

KHun halka hai bahut aap ke diwane ka

aap ab sham-e-sahar baDh ke gale milti hai

baKHt jaga hai baDi der mein parwane ka

dil-e-be-hausla takta hai KHaridar ki rah

koi gahak nahin TuTe hue paimane ka

bazm mein subh hui chha gaya ek sannaTa

silsila chhiD gaya jab aap ke afsane ka