silsile sab ruk gae dil hath se jata raha

silsile sab ruk ga.e dil haath se jaatā rahā

hijr kī dahlīz par ik dard lahrātā rahā

qalb kā dāman junūñ meñ bhī na chhoḌā 'aql ne

dhaḌkanoñ kī chaap sun kar mujh ko ḳhauf aatā rahā

mas.ala us kī anā kā thā ki shohrat kī talab

us kā har ehsān mujh par nekiyāñ Dhātā rahā

maiñ rahā be-ḳhvāb ḳhvāboñ ke tilismī jaal meñ

vo mirī nīñdeñ churā kar loriyāñ gaatā rahā

sabr kī takrār thī josh o junūn-e-ishq se

zindagī bhar dil mujhe maiñ dil ko samjhātā rahā

roz aa kar merī khiḌkī meñ mire bachpan kā chāñd

rakh ke sar ik niim kī Tahnī pe so jaatā rahā

hijr ke bādal chhaTe jab dhuup chamkī 'ishq kī

vasl ke āñgan meñ bhañvrā gul pe mañDlātā rahā

zindagī bebāk ho kar tujh se aage baḌh ga.ī

aur 'āzim' tū lakīroñ par hī itrātā rahā

silsile sab ruk gae dil hath se jata raha

hijr ki dahliz par ek dard lahraata raha

qalb ka daman junun mein bhi na chhoDa 'aql ne

dhaDkanon ki chap sun kar mujh ko KHauf aata raha

masala us ki ana ka tha ki shohrat ki talab

us ka har ehsan mujh par nekiyan Dhata raha

main raha be-KHwab KHwabon ke tilismi jal mein

wo meri ninden chura kar loriyan gata raha

sabr ki takrar thi josh o junun-e-ishq se

zindagi bhar dil mujhe main dil ko samjhata raha

roz aa kar meri khiDki mein mere bachpan ka chand

rakh ke sar ek nim ki Tahni pe so jata raha

hijr ke baadal chhaTe jab dhup chamki 'ishq ki

wasl ke aangan mein bhanwra gul pe manDlata raha

zindagi bebak ho kar tujh se aage baDh gai

aur 'azim' tu lakiron par hi itraata raha