sirf aankhen thin abhi un mein ishaare nahin the

sirf āñkheñ thiiñ abhī un meñ ishāre nahīñ the

dil pe mausam ye mohabbat ne utāre nahīñ the

jaisī rātoñ meñ safar ham ne kiyā thā āġhāz

sar-ba-sar samteñ hī samteñ thiiñ sitāre nahīñ the

ab to har shaḳhs kī ḳhātir huī matlūb hameñ

ham kisī ke bhī nahīñ the jo tumhāre nahīñ the

jab hameñ koī tavaqqo hī nahīñ thī tum se

aise us vaqt bhī hālāt hamāre nahīñ the

mohlat-e-umr meñ rahne diye us ne shāmil

jo shab o roz kabhī ham ne guzāre nahīñ the

jab nazāre the to āñkhoñ ko nahīñ thī parvā

ab inhī āñkhoñ ne chāhā to nazāre nahīñ the

Duub hī jaanā muqaddar thā hamārā ki vahāñ

jis taraf dekhiye paanī thā kināre nahīñ the

kyuuñ nahīñ ishq bhalā har-kas-o-nā-kas kā shi.ār

is tijārat meñ agar itne ḳhasāre nahīñ the

Thiik hai koī madad ko nahīñ pahuñchā lekin

ye bhī sach hai ki 'zafar' ham bhī pukāre nahīñ the

sirf aankhen thin abhi un mein ishaare nahin the

dil pe mausam ye mohabbat ne utare nahin the

jaisi raaton mein safar hum ne kiya tha aaghaz

sar-ba-sar samten hi samten thin sitare nahin the

ab to har shaKHs ki KHatir hui matlub hamein

hum kisi ke bhi nahin the jo tumhaare nahin the

jab hamein koi tawaqqo hi nahin thi tum se

aise us waqt bhi haalat hamare nahin the

mohlat-e-umr mein rahne diye us ne shamil

jo shab o roz kabhi hum ne guzare nahin the

jab nazare the to aankhon ko nahin thi parwa

ab inhi aankhon ne chaha to nazare nahin the

Dub hi jaana muqaddar tha hamara ki wahan

jis taraf dekhiye pani tha kinare nahin the

kyun nahin ishq bhala har-kas-o-na-kas ka shiar

is tijarat mein agar itne KHasare nahin the

Thik hai koi madad ko nahin pahuncha lekin

ye bhi sach hai ki 'zafar' hum bhi pukare nahin the