sisakte aab mein kis ki sada hai

sisakte aab meñ kis kī sadā hai

koī dariyā kī tah meñ ro rahā hai

savere merī in āñkhoñ ne dekhā

ḳhudā chāroñ taraf bikhrā huā hai

añdherī raat kā tanhā musāfir

mirī palkoñ pe ab sahmā khaḌā hai

sameTo aur siine meñ chhupā lo

ye sannāTā bahut phailā huā hai

haqīqat surḳh machhlī jāntī hai

samundar kaisā būḌhā devtā hai

pake gehūñ kī ḳhushbū chīḳhtī hai

badan apnā sunahrā ho chukā hai

hamārī shāḳh kā nau-ḳhez pattā

havā ke hoñT aksar chūmtā hai

mujhe un niilī āñkhoñ ne batāyā

tumhārā naam paanī par likhā hai

sisakte aab mein kis ki sada hai

koi dariya ki tah mein ro raha hai

sawere meri in aankhon ne dekha

KHuda chaaron taraf bikhra hua hai

andheri raat ka tanha musafir

meri palkon pe ab sahma khaDa hai

sameTo aur sine mein chhupa lo

ye sannaTa bahut phaila hua hai

haqiqat surKH machhli jaanti hai

samundar kaisa buDha dewta hai

pake gehun ki KHushbu chiKHti hai

badan apna sunahra ho chuka hai

hamari shaKH ka nau-KHez patta

hawa ke honT aksar chumta hai

mujhe un nili aankhon ne bataya

tumhaara nam pani par likha hai