sitare palkon pe jalwa-gar the shikast-e-azm-e-fughan se pahle

sitāre palkoñ pe jalva-gar the shikast-e-azm-e-fuġhāñ se pahle

ġham-e-nihāñ se zamāna vāqif thā sharh-e-soz-e-nihāñ se pahle

hamārī hī sa.ī-e-justajū ne surāġh-e-manzil diyā jahāñ ko

talāsh-e-manzil meñ ham ravāna hue the har kārvāñ se pahle

pasand aayā na bijliyoñ ko koī jo kartīñ tavāf un kā

mile ka.ī aur bhī nasheman unheñ mire āshiyāñ se pahle

sitam-rasīdoñ kī anjuman meñ chhiḌe haiñ jab zālimoñ ke charche

tumhārā naam aa gayā hai aksar zabān par āsmāñ se pahle

unheñ ye zid hai suneñge merī zabāñ se merā fasāna-e-ġham

maiñ sochtā huuñ fasāna-e-ġham sunā.ūñ bhī to kahāñ se pahle

tumhārī ḳhalvat-kade ke parde uThe hue haiñ durust lekin

chhuḌā to luuñ dāman-e-nazar ko tahayyur-e-be-karāñ se pahle

ġharaz ke bande haiñ ahl-e-ālam nahīñ koī bā-vafā jahāñ meñ

na kījiye faisla abhī ye 'nasīr' ke imtihāñ se pahle

sitare palkon pe jalwa-gar the shikast-e-azm-e-fughan se pahle

gham-e-nihan se zamana waqif tha sharh-e-soz-e-nihan se pahle

hamari hi sai-e-justaju ne suragh-e-manzil diya jahan ko

talash-e-manzil mein hum rawana hue the har karwan se pahle

pasand aaya na bijliyon ko koi jo kartin tawaf un ka

mile kai aur bhi nasheman unhen mere aashiyan se pahle

sitam-rasidon ki anjuman mein chhiDe hain jab zalimon ke charche

tumhaara nam aa gaya hai aksar zaban par aasman se pahle

unhen ye zid hai sunenge meri zaban se mera fasana-e-gham

main sochta hun fasana-e-gham sunaun bhi to kahan se pahle

tumhaari KHalwat-kade ke parde uThe hue hain durust lekin

chhuDa to lun daman-e-nazar ko tahayyur-e-be-karan se pahle

gharaz ke bande hain ahl-e-alam nahin koi ba-wafa jahan mein

na kijiye faisla abhi ye 'nasir' ke imtihan se pahle