sitam-e-garmi-e-sahra mujhe malum na tha

sitam-e-garmī-e-sahrā mujhe ma.alūm na thā

ḳhushk ho jā.egā dariyā mujhe ma.alūm na thā

maiñ ne samjhā thā ki firdaus-e-barīñ hai duniyā

ik jahannum hai sarāpā mujhe ma.alūm na thā

chand dānista haqā.eq kī talab kī ḳhātir

zulm Dhā.egā zamāna mujhe ma.alūm na thā

lahlahā uThtā chaman merī umīdoñ kā magar

zard thā vaqt kā chehrā mujhe ma.alūm na thā

dostī pyaar ḳhulūs amn vafā kī ḳhushbū

ye haiñ alfāz-e-tamanna mujhe ma.alūm na thā

bārhā jis ke qarīb aa ke milā mujh ko sukūñ

merā apnā hī thā saaya mujhe ma.alūm na thā

ahd-e-tiflī thā 'kamāl' ahd-e-masarrat-āgīñ

ġham ke saa.e meñ palūñgā mujhe ma.alūm na thā

sitam-e-garmi-e-sahra mujhe malum na tha

KHushk ho jaega dariya mujhe malum na tha

main ne samjha tha ki firdaus-e-barin hai duniya

ek jahannum hai sarapa mujhe malum na tha

chand danista haqaeq ki talab ki KHatir

zulm Dhaega zamana mujhe malum na tha

lahlaha uThta chaman meri umidon ka magar

zard tha waqt ka chehra mujhe malum na tha

dosti pyar KHulus amn wafa ki KHushbu

ye hain alfaz-e-tamanna mujhe malum na tha

barha jis ke qarib aa ke mila mujh ko sukun

mera apna hi tha saya mujhe malum na tha

ahd-e-tifli tha 'kamal' ahd-e-masarrat-agin

gham ke sae mein palunga mujhe malum na tha