sitam-ijad rahoge sitam-ijad rahe

sitam-ījād rahoge sitam-ījād rahe

is meñ ab shaad rahe yā koī nāshād rahe

aap ne ahd kiyā hai mirī ġham-ḳhvārī kā

ab ijāzat ho to ye ahd mujhe yaad rahe

gar mirī tauba ko maqbūl shikast-e-tauba

merī tadbīr meñ taqdīr kī uftād rahe

qaid-e-hastī se bahut tum ne kiye haiñ āzād

koī is qaid-e-mohabbat kī bhī mī.ād rahe

vo ḳhudā.ī ho to ho shān-e-tajallī to nahīñ

jis tajallī meñ nigāhoñ ko ḳhudā yaad rahe

zulm hai tujh se ba-taqrīb-e-takalluf mansūb

varna taqdīr-e-vafā ye hai ki barbād rahe

dil-e-ābād kā 'fānī' koī mafhūm nahīñ

haañ magar jis meñ koī hasrat-e-barbād rahe

sitam-ijad rahoge sitam-ijad rahe

is mein ab shad rahe ya koi nashad rahe

aap ne ahd kiya hai meri gham-KHwari ka

ab ijazat ho to ye ahd mujhe yaad rahe

gar meri tauba ko maqbul shikast-e-tauba

meri tadbir mein taqdir ki uftad rahe

qaid-e-hasti se bahut tum ne kiye hain aazad

koi is qaid-e-mohabbat ki bhi miad rahe

wo KHudai ho to ho shan-e-tajalli to nahin

jis tajalli mein nigahon ko KHuda yaad rahe

zulm hai tujh se ba-taqrib-e-takalluf mansub

warna taqdir-e-wafa ye hai ki barbaad rahe

dil-e-abaad ka 'fani' koi mafhum nahin

han magar jis mein koi hasrat-e-barbaad rahe