sitam ko un ka karam kahen hum jafa ko mehr-o-wafa kahen hum

sitam ko un kā karam kaheñ ham jafā ko mehr-o-vafā kaheñ ham

zamāna is baat par ba-zid hai ki nāravā ko ravā kaheñ ham

kuchh aisā saudā hai sab ke sar meñ mizāj bigḌe hue haiñ sab ke

koī bhī suntā nahīñ kisī kī kaheñ kisī se to kyā kaheñ ham

ye saarī bāteñ haiñ dar-haqīqat hamāre aḳhlāq ke munāfī

suneñ burā.ī na ham kisī kī na ḳhud kisī ko burā kaheñ ham

na jaane ham se hai kyā tavaqqo? nahīñ kisī tarah jān-baḳhshī

zamāna is pe bhī mo'tariz hai agar ḳhudā ko ḳhudā kaheñ ham

hamārī aa.heñ bhī be-asar haiñ hamāre naale bhī nā-rasā haiñ

vo dard jis kā na ho mudāvā use na kyuuñ lā-davā kaheñ ham

na din ko hai kuchh sukūñ mayassar na shab ko aatī hai niiñd ham ko

yahī mohabbat kī ibtidā hai to phir kise intihā kaheñ ham

yahī taqāzā hai maslahat kā isī meñ hai āfiyat bhī 'ātish'

kisī se dil ko jo rañj pahuñche use ḳhudā kī razā kaheñ ham

sitam ko un ka karam kahen hum jafa ko mehr-o-wafa kahen hum

zamana is baat par ba-zid hai ki narawa ko rawa kahen hum

kuchh aisa sauda hai sab ke sar mein mizaj bigDe hue hain sab ke

koi bhi sunta nahin kisi ki kahen kisi se to kya kahen hum

ye sari baaten hain dar-haqiqat hamare aKHlaq ke munafi

sunen burai na hum kisi ki na KHud kisi ko bura kahen hum

na jaane hum se hai kya tawaqqo? nahin kisi tarah jaan-baKHshi

zamana is pe bhi mo'tariz hai agar KHuda ko KHuda kahen hum

hamari aahen bhi be-asar hain hamare nale bhi na-rasa hain

wo dard jis ka na ho mudawa use na kyun la-dawa kahen hum

na din ko hai kuchh sukun mayassar na shab ko aati hai nind hum ko

yahi mohabbat ki ibtida hai to phir kise intiha kahen hum

yahi taqaza hai maslahat ka isi mein hai aafiyat bhi 'atish'

kisi se dil ko jo ranj pahunche use KHuda ki raza kahen hum