sitam-taraaz talak zaKHm-ashna bhi to ho

sitam-tarāz talak zaḳhm-āshnā bhī to ho

ufuq ufuq shafaq-e-dard kī hinā bhī to ho

ḳhalā-ba-pā huuñ magar dasht dasht ḳhāk-ba-sar

kuchh apnā aap miTāne kī intihā bhī to ho

maiñ ḳhaak ban ke fazā meñ bikhar bikhar jā.ūñ

kisī ke paañv tale zīna-e-sabā bhī to ho

havas kī barf badan se pighal to jaa.e magar

sharar sharar koī paikar kabhī chhuā bhī to ho

nazar nazar meñ hazāroñ savāl haiñ lekin

falak se koī mirī samt dekhtā bhī to ho

na.ī ghaḌī na.e sahrā na.e ufuq laa.ī

kisī tarah haq-e-āshuftagī adā bhī to ho

barahnagī mirā maz.hab mirā sulūk bane

magar badan pe kisī qadr kī ridā bhī to ho

mirī vafāoñ kī gahrā.iyoñ kā khoj to le

vo bahr-e-husn kabhī zarf-āzmā bhī to ho

faqat bayān-e-haqīqat nahīñ hai manzil-e-haq

jihat-shanās vo hai jo jihat-numā bhī to ho

tire sivā bhī kisī ko kahūñ nadīm magar

tire sivā koī shā.ista-vafā bhī to ho

sitam-taraaz talak zaKHm-ashna bhi to ho

ufuq ufuq shafaq-e-dard ki hina bhi to ho

KHala-ba-pa hun magar dasht dasht KHak-ba-sar

kuchh apna aap miTane ki intiha bhi to ho

main KHak ban ke faza mein bikhar bikhar jaun

kisi ke panw tale zina-e-saba bhi to ho

hawas ki barf badan se pighal to jae magar

sharar sharar koi paikar kabhi chhua bhi to ho

nazar nazar mein hazaron sawal hain lekin

falak se koi meri samt dekhta bhi to ho

nai ghaDi nae sahra nae ufuq lai

kisi tarah haq-e-ashuftagi ada bhi to ho

barahnagi mera mazhab mera suluk bane

magar badan pe kisi qadr ki rida bhi to ho

meri wafaon ki gahraiyon ka khoj to le

wo bahr-e-husn kabhi zarf-azma bhi to ho

faqat bayan-e-haqiqat nahin hai manzil-e-haq

jihat-shanas wo hai jo jihat-numa bhi to ho

tere siwa bhi kisi ko kahun nadim magar

tere siwa koi shaista-wafa bhi to ho