sitam ye hai ki un ka jaur-e-paiham kam nahin hota

sitam ye hai ki un kā jaur-e-paiham kam nahīñ hotā

mizāj-e-ishq is par bhī kabhī barham nahīñ hotā

ye hālat hai ki kuchh pā kar ḳhushī dil ko nahīñ hotī

agar kuchh kho bhī jaatā hai to us kā ġham nahīñ hotā

kabhī hañste haiñ aur āñkhoñ meñ aañsū aa.e jaate haiñ

kabhī rote haiñ aur dāmān-e-mizhgāñ nam nahīñ hotā

ḳhulūs aur āshtī kī raah meñ āñkheñ bichhātā huuñ

ġhurūr-e-jāh ke aage mirā sar ḳham nahīñ hotā

nishān-e-naqsh-e-pā chhoḌūñgā har ik gaam par mujh se

guzishta azmatoñ kī ḳhaak par mātam nahīñ hotā

sitam ye hai ki un ka jaur-e-paiham kam nahin hota

mizaj-e-ishq is par bhi kabhi barham nahin hota

ye haalat hai ki kuchh pa kar KHushi dil ko nahin hoti

agar kuchh kho bhi jata hai to us ka gham nahin hota

kabhi hanste hain aur aankhon mein aansu aae jate hain

kabhi rote hain aur daman-e-mizhgan nam nahin hota

KHulus aur aashti ki rah mein aankhen bichhata hun

ghurur-e-jah ke aage mera sar KHam nahin hota

nishan-e-naqsh-e-pa chhoDunga har ek gam par mujh se

guzishta azmaton ki KHak par matam nahin hota