sitamgari bhi meri kushtagan bhi mere the

sitamgarī bhī mirī kushtagāñ bhī mere the

bayān karte hue nauha-ḳhvāñ bhī mere the

fazā meñ uḌte parindoñ kī Daar merī thī

nishāne mere the tīr-o-kamāñ bhī mere the

vo hajv merī thī vo sab qasīde mere the

tumhāre baare meñ vahm-o-gumāñ bhī mere the

saf-e-azīzāñ saf-e-dushmanāñ bhī merī thī

vo jañg merī thī sūd-o-ziyāñ bhī mere the

safar bhī merā thā aur gard-bād mere the

vo ishq merā thā aur imtihāñ bhī mere the

lahū bhī merā thā aur āstīñ bhī merī thī

vo teġh merī thī us par nishāñ bhī mere the

hazīmateñ bhī mirī muḳhbirī bhī merī thī

halāk hote hue pāsbāñ bhī mere the

sitamgari bhi meri kushtagan bhi mere the

bayan karte hue nauha-KHwan bhi mere the

faza mein uDte parindon ki Dar meri thi

nishane mere the tir-o-kaman bhi mere the

wo hajw meri thi wo sab qaside mere the

tumhaare bare mein wahm-o-guman bhi mere the

saf-e-azizan saf-e-dushmanan bhi meri thi

wo jang meri thi sud-o-ziyan bhi mere the

safar bhi mera tha aur gard-baad mere the

wo ishq mera tha aur imtihan bhi mere the

lahu bhi mera tha aur aastin bhi meri thi

wo tegh meri thi us par nishan bhi mere the

hazimaten bhi meri muKHbiri bhi meri thi

halak hote hue pasban bhi mere the