siwae-dar-ba-dari usko KHak milta hai

sivā.e-dar-ba-darī us ko ḳhaak miltā hai

jo āsmān se apnī zamīñ badaltā hai

maiñ jab bhī ghar se nikaltā huuñ raat ko tanhā

charāġh le ke koī saath saath chaltā hai

ajiib hotā hai nazzārgān-e-shauq kā haal

ridā-e-māh pahan kar vo jab nikaltā hai

barū-e-chashm ridā-e-hijāb taan lī jaa.e

vo zer-e-sāya-e-gul pairahan badaltā hai

fareb-e-qurb to dekho ki mere pahlū meñ

tamām raat koī karvaTeñ badaltā hai

guzār dete haiñ āvāra-gard aag ke gird

jo be-Thikāna haiñ un kā bhī kaam chaltā hai

hamāre dam se bhī hai mausamoñ kī gul-kārī

charāġh-e-lāla meñ dil kā lahū bhī jaltā hai

maiñ vo shahīd-e-vafā huuñ ki qatl kar ke mujhe

mirā ġhanīm ta.assuf se haath maltā hai

hameñ nasīb huā aisī manziloñ kā safar

qadam qadam pe jahāñ rāsta badaltā hai

havā-e-dāman-e-rañgīñ ye kah ga.ī 'tishna'

hamāre sāmne kis kā charāġh jaltā hai

siwae-dar-ba-dari us ko KHak milta hai

jo aasman se apni zamin badalta hai

main jab bhi ghar se nikalta hun raat ko tanha

charagh le ke koi sath sath chalta hai

ajib hota hai nazzargan-e-shauq ka haal

rida-e-mah pahan kar wo jab nikalta hai

baru-e-chashm rida-e-hijab tan li jae

wo zer-e-saya-e-gul pairahan badalta hai

fareb-e-qurb to dekho ki mere pahlu mein

tamam raat koi karwaTen badalta hai

guzar dete hain aawara-gard aag ke gird

jo be-Thikana hain un ka bhi kaam chalta hai

hamare dam se bhi hai mausamon ki gul-kari

charagh-e-lala mein dil ka lahu bhi jalta hai

main wo shahid-e-wafa hun ki qatl kar ke mujhe

mera ghanim tassuf se hath malta hai

hamein nasib hua aisi manzilon ka safar

qadam qadam pe jahan rasta badalta hai

hawa-e-daman-e-rangin ye kah gai 'tishna'

hamare samne kis ka charagh jalta hai