siyah raat ki har dilkashi ko bhul gae

siyāh raat kī har dilkashī ko bhuul ga.e

diye jalā ke hamīñ raushnī ko bhuul ga.e

kisī kalī ke tabassum ne bekalī dī hai

kalī hañsī to ham apnī hañsī ko bhuul ga.e

jahāñ meñ aur rah-o-rasm-e-āshiqī kyā hai

fareb-ḳhurda tirī be-ruḳhī ko bhuul ga.e

yahī hai sheva-e-ahl-e-vafā zamāne meñ

kisī ko dil se lagāyā kisī ko bhuul ga.e

zarā sī baat pe dāman chhuḌā liyā ham se

tamām umr kī vābastagī ko bhuul ga.e

ḳhudā-parast ḳhudā se to lau lagāte rahe

ḳhudā kī shaan magar aadmī ko bhuul ga.e

vo jis ke ġham ne ġham-e-zindagī diyā hai 'zafar'

usī ke ġham meñ ġham-e-zindagī ko bhuul ga.e

siyah raat ki har dilkashi ko bhul gae

diye jala ke hamin raushni ko bhul gae

kisi kali ke tabassum ne bekali di hai

kali hansi to hum apni hansi ko bhul gae

jahan mein aur rah-o-rasm-e-ashiqi kya hai

fareb-KHurda teri be-ruKHi ko bhul gae

yahi hai shewa-e-ahl-e-wafa zamane mein

kisi ko dil se lagaya kisi ko bhul gae

zara si baat pe daman chhuDa liya hum se

tamam umr ki wabastagi ko bhul gae

KHuda-parast KHuda se to lau lagate rahe

KHuda ki shan magar aadmi ko bhul gae

wo jis ke gham ne gham-e-zindagi diya hai 'zafar'

usi ke gham mein gham-e-zindagi ko bhul gae