siyah raat ki sab aazmaishen manzur

siyāh raat kī sab āzmā.isheñ manzūr

kisī sahar ke ujāle kā aasrā to milā

nazar milā na sake ham se vo to ġham kyā hai

ki dil se dil ke dhaḌakne kā silsila to milā

hai aaj aur hī kuchh zulf-e-tābdār meñ ḳham

bhaTakne vaale ko manzil kā rāsta to milā

sarishk-e-chashm se motī bahut luTā.e ga.e

tirī nigah ke shahīdoñ ko ḳhūñ-bahā to milā

jahāñ nigāh se insāñ banā.e jaate haiñ

vo bāb-e-mai-kada mere liye khulā to milā

sitam-zarīf mohabbat ko jurm kahte haiñ

gunāh-gār ko jiine kā aasrā to milā

na rahnumā hai na manzil dayār-e-ulfat meñ

qadam uThāte hī ḳhizr-e-shikasta-pā to milā

mire junūñ ne khilā.e haiñ phuul sahrā meñ

mire junūñ se bahāroñ ko hausla to milā

samajhte the ki vafā-nā-shanās hai duniyā

'surūr' ham ko bhī ik dard-āshnā to milā

siyah raat ki sab aazmaishen manzur

kisi sahar ke ujale ka aasra to mila

nazar mila na sake hum se wo to gham kya hai

ki dil se dil ke dhaDakne ka silsila to mila

hai aaj aur hi kuchh zulf-e-tabdar mein KHam

bhaTakne wale ko manzil ka rasta to mila

sarishk-e-chashm se moti bahut luTae gae

teri nigah ke shahidon ko KHun-baha to mila

jahan nigah se insan banae jate hain

wo bab-e-mai-kada mere liye khula to mila

sitam-zarif mohabbat ko jurm kahte hain

gunah-gar ko jine ka aasra to mila

na rahnuma hai na manzil dayar-e-ulfat mein

qadam uThate hi KHizr-e-shikasta-pa to mila

mere junun ne khilae hain phul sahra mein

mere junun se bahaaron ko hausla to mila

samajhte the ki wafa-na-shanas hai duniya

'surur' hum ko bhi ek dard-ashna to mila