sochiye garmi-e-guftar kahan se aai

sochiye garmi-e-guftār kahāñ se aa.ī

lab-ba-lab ḳhvāhish-e-iz.hār kahāñ se aa.ī

kis hinā-hāth se āñgan hai mo.attar itnā

vaqt-e-ḳhush sā.at-e-bedār kahāñ se aa.ī

haañ ye mumkin hai nayā moḌ ho phūloñ jaisā

phir ye pāzeb kī jhankār kahāñ se aa.ī

ḳhuun meñ nashsha-e-iz.hār kā ḳhanjar paivast

darmiyāñ chup kī ye talvār kahāñ se aa.ī

ham ḳharābe ke musāfir haiñ hamāre dil meñ

ārzū-e-dar-o-dīvār kahāñ se aa.ī

sochtā huuñ ki ḳhush-andāz diloñ meñ ai 'rāz'

shorish-e-ḳhū-e-dil-āzār kahāñ se aa.ī

sochiye garmi-e-guftar kahan se aai

lab-ba-lab KHwahish-e-izhaar kahan se aai

kis hina-hath se aangan hai moattar itna

waqt-e-KHush saat-e-bedar kahan se aai

han ye mumkin hai naya moD ho phulon jaisa

phir ye pazeb ki jhankar kahan se aai

KHun mein nashsha-e-izhaar ka KHanjar paiwast

darmiyan chup ki ye talwar kahan se aai

hum KHarabe ke musafir hain hamare dil mein

aarzu-e-dar-o-diwar kahan se aai

sochta hun ki KHush-andaz dilon mein ai 'raaz'

shorish-e-KHu-e-dil-azar kahan se aai