sochna ruh mein kanTe se bichhae rakhna

sochnā ruuh meñ kāñTe se bichhā.e rakhnā

ye bhī kyā saañs kī talvār banā.e rakhnā

ab to ye rasm hai ḳhushbū ke qasīde paḌhnā

phuul gul-dān meñ kāġhaz ke sajā.e rakhnā

tīrgī TuuT paḌe bhī to burā mat kahiyo

ho sake gar to charāġhoñ ko jalā.e rakhnā

raah meñ bhiiḌ bhī paḌtī hai abhī se sun lo

haath se haath milā hai to milā.e rakhnā

kitnā āsān hai tā.īd kī ḳhū kar lenā

kitnā dushvār hai apnī koī raa.e rakhnā

koī taḳhlīq bhī takmīl na paa.e merī

nazm likh luuñ to mujhe naam na aa.e rakhnā

apnī parchhā.īñ se muñh moḌ na lenā 'anvar'

tum use aaj bhī bātoñ meñ lagā.e rakhnā

sochna ruh mein kanTe se bichhae rakhna

ye bhi kya sans ki talwar banae rakhna

ab to ye rasm hai KHushbu ke qaside paDhna

phul gul-dan mein kaghaz ke sajae rakhna

tirgi TuT paDe bhi to bura mat kahiyo

ho sake gar to charaghon ko jalae rakhna

rah mein bhiD bhi paDti hai abhi se sun lo

hath se hath mila hai to milae rakhna

kitna aasan hai taid ki KHu kar lena

kitna dushwar hai apni koi rae rakhna

koi taKHliq bhi takmil na pae meri

nazm likh lun to mujhe nam na aae rakhna

apni parchhain se munh moD na lena 'anwar'

tum use aaj bhi baaton mein lagae rakhna