sochta rahta hun takmil-e-wafa kaise ho

sochtā rahtā huuñ takmīl-e-vafā kaise ho

aadmī bhī vo nahīñ hai to ḳhudā kaise ho

ishq ko hausla-e-tark-e-vafā kaise ho

lafz ma.anī kī sadāqat se judā kaise ho

maiñ to pūchhūñgā ki tum sab ke ḳhudā kaise ho

merī āvāz farishtoñ kī sadā kaise ho

ek ġham ho to bikhar jaa.e mire chehre par

ġhair-mahdūd masā.ib haiñ ziyā kaise ho

sochne vāloñ kī niyyat ko ḳhudā hī jaane

baat vāloñ ko nahīñ fikr-e-vafā kaise ho

us ne majbūr-e-vafā jaan ke muñh pher liyā

mujh se ye bhuul huī pūchh liyā kaise ho

ik sulagtā huā dil tum se jalāyā na gayā

jaane tum muḳhlis-e-arbāb-e-vafā kaise ho

kis kī sūrat meñ nahīñ jalva-e-ḳhūn-e-mazdūr

ḳhūn-e-mazdūr kī qīmat bhī adā kaise ho

ishq nā-vāqif-e-ādāb-e-talab hai 'anjum'

husn āmāda-e-iz.hār-e-vafā kaise ho

sochta rahta hun takmil-e-wafa kaise ho

aadmi bhi wo nahin hai to KHuda kaise ho

ishq ko hausla-e-tark-e-wafa kaise ho

lafz mani ki sadaqat se juda kaise ho

main to puchhunga ki tum sab ke KHuda kaise ho

meri aawaz farishton ki sada kaise ho

ek gham ho to bikhar jae mere chehre par

ghair-mahdud masaib hain ziya kaise ho

sochne walon ki niyyat ko KHuda hi jaane

baat walon ko nahin fikr-e-wafa kaise ho

us ne majbur-e-wafa jaan ke munh pher liya

mujh se ye bhul hui puchh liya kaise ho

ek sulagta hua dil tum se jalaya na gaya

jaane tum muKHlis-e-arbab-e-wafa kaise ho

kis ki surat mein nahin jalwa-e-KHun-e-mazdur

KHun-e-mazdur ki qimat bhi ada kaise ho

ishq na-waqif-e-adab-e-talab hai 'anjum'

husn aamada-e-izhaar-e-wafa kaise ho