sochte rahte hain aksar raat mein

sochte rahte haiñ aksar raat meñ

Duub kyuuñ jaate haiñ manzar raat meñ

kis ne lahrā.ī haiñ zulfeñ duur tak

kaun phirtā hai khule-sar raat meñ

chāñdnī pī kar bahak jaatī hai raat

chāñd ban jaatā hai sāġhar raat meñ

chuum lete haiñ kināroñ kī hadeñ

jhuum uThte haiñ samundar raat meñ

khiḌkiyoñ se jhāñktī hai raushnī

battiyāñ jaltī haiñ ghar ghar raat meñ

raat kā ham par baḌā ehsān hai

ro liyā karte haiñ khul kar raat meñ

dil kā pahlū meñ gumāñ hotā nahīñ

aañkh ban jaatī hai patthar raat meñ

'alvī' sāhab vaqt hai ārām kā

so raho sab kuchh bhulā kar raat meñ

sochte rahte hain aksar raat mein

Dub kyun jate hain manzar raat mein

kis ne lahrai hain zulfen dur tak

kaun phirta hai khule-sar raat mein

chandni pi kar bahak jati hai raat

chand ban jata hai saghar raat mein

chum lete hain kinaron ki haden

jhum uThte hain samundar raat mein

khiDkiyon se jhankti hai raushni

battiyan jalti hain ghar ghar raat mein

raat ka hum par baDa ehsan hai

ro liya karte hain khul kar raat mein

dil ka pahlu mein guman hota nahin

aankh ban jati hai patthar raat mein

'alwi' sahab waqt hai aaram ka

so raho sab kuchh bhula kar raat mein