soe hue badan sar-e-mahshar uThaiye

so.e hue badan sar-e-mahshar uThā.iye

ye kyā ki bār-e-umr mukarrar uThā.iye

āñkhoñ meñ khīñch lījiye aks-e-jamāl-e-yār

ik kūza-e-atash meñ samundar uThā.iye

dil sañg hai to sañg ko namnāk kījiye

is nam se phir ḳhamīr-e-gul-e-tar uThā.iye

āñkheñ bichhā.e rakhiye sar-e-rāh-e-intizār

palkoñ pe nāz-o-ġhamza-e-dilbar uThā.iye

jab maslahat ho bai'at-e-shab-e-zād pe musir

koī charāġh bar-sar-e-sarsar uThā.iye

duniyā hai ik uruus hazār āshnā 'muhib'

ab hajla-e-urūs se bistar uThā.iye

soe hue badan sar-e-mahshar uThaiye

ye kya ki bar-e-umr mukarrar uThaiye

aankhon mein khinch lijiye aks-e-jamal-e-yar

ek kuza-e-atash mein samundar uThaiye

dil sang hai to sang ko namnak kijiye

is nam se phir KHamir-e-gul-e-tar uThaiye

aankhen bichhae rakhiye sar-e-rah-e-intizar

palkon pe naz-o-ghamza-e-dilbar uThaiye

jab maslahat ho bai'at-e-shab-e-zad pe musir

koi charagh bar-sar-e-sarsar uThaiye

duniya hai ek urus hazar aashna 'muhib'

ab hajla-e-urus se bistar uThaiye