soz-e-darun se jal-bujho lekin dhuan na ho

soz-e-darūñ se jal-bujho lekin dhuāñ na ho

hai dard-e-dil kī shart ki lab par fuġhāñ na ho

phir ho rahā hai shor-e-salā-e-nabard-e-ishq

haañ ai dahān-e-zaḳhm javāb al-amāñ na ho

bāzār-e-jāñ-farosh meñ saudā na ho ye kyā

gāhak mile to jins to ye bhī garāñ na ho

is dard-e-lā-javāb kī kyūñkar karūñ davā

vo hāl-e-dil-nashīñ bhī to mujh se bayāñ na ho

kyā fā.eda gar us ne chhupāyā bhī dard-e-dil

ye kaam jab bane ki mizha ḳhūñ-chakāñ na ho

kyā kiije chun ke mā.ida-e-dil ko laḳht laḳht

terā hī tiir siine meñ jab mehmāñ na ho

ḳhauf-e-raqīb kā to ye 'ālam aur us pe ishq

sab chāhte haiñ chaah kā un par gumāñ na ho

hai vasl-e-yār kī bhī tamannā kā hausla

Dar ye bhī hai ki tab.a-e-adū par girāñ na ho

pahlū se dil ko le ke vo kahte haiñ naaz se

kyā aa.eñ ghar meñ aap hī jab mezbāñ na ho

sunte hī jis ke ḳhalq se kohrām mach gayā

'jauhar' vo terī hī to kahīñ dāstāñ na ho

soz-e-darun se jal-bujho lekin dhuan na ho

hai dard-e-dil ki shart ki lab par fughan na ho

phir ho raha hai shor-e-sala-e-nabard-e-ishq

han ai dahan-e-zaKHm jawab al-aman na ho

bazar-e-jaan-farosh mein sauda na ho ye kya

gahak mile to jins to ye bhi garan na ho

is dard-e-la-jawab ki kyunkar karun dawa

wo haal-e-dil-nashin bhi to mujh se bayan na ho

kya faeda gar us ne chhupaya bhi dard-e-dil

ye kaam jab bane ki mizha KHun-chakan na ho

kya kije chun ke maida-e-dil ko laKHt laKHt

tera hi tir sine mein jab mehman na ho

KHauf-e-raqib ka to ye 'alam aur us pe ishq

sab chahte hain chah ka un par guman na ho

hai wasl-e-yar ki bhi tamanna ka hausla

Dar ye bhi hai ki taba-e-adu par giran na ho

pahlu se dil ko le ke wo kahte hain naz se

kya aaen ghar mein aap hi jab mezban na ho

sunte hi jis ke KHalq se kohram mach gaya

'jauhar' wo teri hi to kahin dastan na ho