soz-e-firaq dil mein chhupae hue hain hum

soz-e-firāq dil meñ chhupā.e hue haiñ ham

aur lab pe ik sukūt sajā.e hue haiñ ham

jo āshnā nahīñ haiñ mohabbat kī aañch se

kyuuñ aas un se phir bhī lagā.e hue haiñ ham

sho.ale jo bujh chuke haiñ unheñ tum havā na do

dil meñ hī ek aag lagā.e hue haiñ ham

tauba re in kī sañg-dilī aur shauq-e-dīd

kyā ḳhuub haal apnā banā.e hue haiñ ham

kahne ko duur ham se bahut duur vo sahī

par fāsle diloñ ke miTā.e hue haiñ ham

jaate haiñ de ke vo to 'sabā' rut ḳhizāoñ kī

dil ke chaman to phir bhī khilā.e hue haiñ ham

soz-e-firaq dil mein chhupae hue hain hum

aur lab pe ek sukut sajae hue hain hum

jo aashna nahin hain mohabbat ki aanch se

kyun aas un se phir bhi lagae hue hain hum

shoale jo bujh chuke hain unhen tum hawa na do

dil mein hi ek aag lagae hue hain hum

tauba re in ki sang-dili aur shauq-e-did

kya KHub haal apna banae hue hain hum

kahne ko dur hum se bahut dur wo sahi

par fasle dilon ke miTae hue hain hum

jate hain de ke wo to 'saba' rut KHizaon ki

dil ke chaman to phir bhi khilae hue hain hum