soz-e-gham de ke mujhe usne ye irshad kiya

soz-e-ġham de ke mujhe us ne ye irshād kiyā

jā tujhe kashmakash-e-dahr se āzād kiyā

vo kareñ bhī to kin alfāz meñ terā shikva

jin ko terī nigah-e-lutf ne barbād kiyā

dil kī choToñ ne kabhī chain se rahne na diyā

jab chalī sard havā maiñ ne tujhe yaad kiyā

ai maiñ sau jaan se is tarz-e-takallum ke nisār

phir to farmā.iye kyā aap ne irshād kiyā

is kā ronā nahīñ kyuuñ tum ne kiyā dil barbād

is kā ġham hai ki bahut der meñ barbād kiyā

itnā mānūs huuñ fitrat se kalī jab chaTkī

jhuk ke maiñ ne ye kahā mujh se kuchh irshād kiyā

merī har saañs hai is baat kī shāhid ai maut

maiñ ne har lutf ke mauqe pe tujhe yaad kiyā

mujh ko to hosh nahīñ tum ko ḳhabar ho shāyad

log kahte haiñ ki tum ne mujhe barbād kiyā

kuchh nahīñ is ke sivā 'josh' harīfoñ kā kalām

vasl ne shaad kiyā hijr ne nāshād kiyā

soz-e-gham de ke mujhe us ne ye irshad kiya

ja tujhe kashmakash-e-dahr se aazad kiya

wo karen bhi to kin alfaz mein tera shikwa

jin ko teri nigah-e-lutf ne barbaad kiya

dil ki choTon ne kabhi chain se rahne na diya

jab chali sard hawa main ne tujhe yaad kiya

ai main sau jaan se is tarz-e-takallum ke nisar

phir to farmaiye kya aap ne irshad kiya

is ka rona nahin kyun tum ne kiya dil barbaad

is ka gham hai ki bahut der mein barbaad kiya

itna manus hun fitrat se kali jab chaTki

jhuk ke main ne ye kaha mujh se kuchh irshad kiya

meri har sans hai is baat ki shahid ai maut

main ne har lutf ke mauqe pe tujhe yaad kiya

mujh ko to hosh nahin tum ko KHabar ho shayad

log kahte hain ki tum ne mujhe barbaad kiya

kuchh nahin is ke siwa 'josh' harifon ka kalam

wasl ne shad kiya hijr ne nashad kiya